24 August 2023, Agartala: 20-Boxanagar bai 23-Dhanpur Assembly chongbari achokthaini bye-election hapang BJP bodolni bagoi jeswk nangmani is...
24 August 2023, Agartala: 20-Boxanagar bai 23-Dhanpur Assembly chongbari achokthaini bye-election hapang BJP bodolni bagoi jeswk nangmani iswkno nangwk kebengnai bodolni daiyobo. Tmwi hinba, i bye-election daiyo hapang BJP bodolbo kaplai ongnani naiywk, kebengnai bodolbo kaplai ongnani naiywk. Aini bagoi jani je phran tongmani karelaikha hasteni political bodolrok.
Iboni bisingo hasteni kebengnai bodolni vote tabakjakthwk, kaisa jegagono klaithwk hinoi kebengnai bodol ojamarok thaincha onglaihaini bagoi achoklaijak, kokchaplaijak.
Iboni bising miya 22 August salmarini hor jorago Melarmathni CPI (M) bodolni habanogo hasteni kebengnai bodolni ojamarokni khokjak-huijak khlai kuthunglaimwng I bye-electiongo hapang BJP bodolni bagoi uanajaknai koktma. Kebengnai bodolni ojamarokni I kuthunaimwngni pilik tabok social media gnangoi barikhlai lwkjak (viral).
Satai klaiywk, bye-electionno lagwi hasteni kebengnai bodolni ojamarokni i khokjak-huijak khlai kuthunglaimwngni koktma poila 'Cpim Congress' bwmwngoi Facebook pageni bisingtwi sagwi makha.
Pilik daiyo numanitwi I kuthulaimwngo CPI(M) bodolni ongoi CPI(M) Tripura haste tangphang Jitendra Chaudhary, khukphang Narayan Kar, kacham montri Manik Dey, kacham MLA Sudhan Das, Tipra Mothani ongoi twiphang Bijoy Kumar Hrangkhawl, TTAADCni achokphang Jagadish Debbarma, hasteni kebengnai bodolni ojama Animesh Debbarma, MLA Briswaketu Debbarma, Congress bodolni ongoi Tripura Pradesh Congress Committeeni twiphang Ashis Saha song tongbaiywk hinoi koktma.
Aro sal kisani olo bye-election songchajaknani sakango hasteni kebengnai bodolni ojamarokni thainchakhlai ibotwi khokjak-huijak (secret) khlai kuthunglaimwng aro kokchaplaimwng hapang BJP bodolni bagoi kaisa challenge ongoi bachakha.
No comments