Advt.no Lagwi Tiprasa Mediano Hanang-Pinang, Khorang Tisaka Tiprasa Kokthumnairok

25 August 2023, Khumulwng:  Sorolai si aro sorolai uansokjak Media bai krwngjak Tiprasa journalistrok sakni mathai-soktai manani bagoi lamag...

25 August 2023, Khumulwng: Sorolai si aro sorolai uansokjak Media bai krwngjak Tiprasa journalistrok sakni mathai-soktai manani bagoi lamago akhogwi khorang tisani nangnai hinoi. Mator, i uansokjakya samwngno uansokrokha tabokni TTAADC hapang. Auaimwng ebakhlai Advertisement rothanigo Tiprasa Mediarokno hanang-pinang khlaijakmani hinoi koksilchakwngni koktma kasai phaika. Aini bagoi tini hasteni kabangma media bai krwngjak Tiprasa koktmathungnai aro koktma auainai bodolrok Khumulwngni ICAT tangbedekni habanokni haplam baskango achogoi khorang tisalaimanibo nujakkha. 

Koktmani bisingtwi sagwi majakkha, thangnai 19 August salmarigo Tripura haste gnangoi borom rogoi palaijakkha Maharaja Bir Bikramni bisi sarachiba achaima sal palaijakkha. TTAADC bai Tripura haste hapangbo kothe kothe pana songchagwi i salno palaikha. 

I sal rwgwi TTAADC hapangni kokthum hukumu tangbedekni bwkhaktwi hasteni kaisni koktma channel aro koktma balaino auaimwng ebakhlai Advertisement rojakkha. Social mediago lokjak (viral) kokthum rwgwi saimajakkha, kaisa English koktma balai 'Tripura Times', kainoi Bangla koktma balai 'Ajker Fariad' bai 'Naba Panji' aro kaibrwi TV channel Chini Khorang, Kok Tripura, Swrang Chati aro Khumpui Tv. O kaisni koktma auaimwngo sorono bwswk rang rokha roya ibo tabokbo sraichayakho. Aiphabo Tiprasa koktma auainairokno advertisement romano mwngoi hanang-pinang khlaijakkha hinoi hasteni kabangma koktma auainairok bai social mediani bisingtwi koksilchajakkha.

ADC amchaini phatarni kisaswk koktma balai aro saiywi lakhojak kisaswk Kokborok channelno siming TTAADC hapangni kothe kothe advertisement rogwi sakni muchutwi TTAADC hapangni ICA tangbedek samwng khlaiywi tongwk, ibono lagwi garakhlai choba khlaijaknai hinoi saklaiywi thangnai 23 August 2023 salmarigo Press Release khlaika Tripura Indigenous Peoples Press Association (TIPPA) bai Tiprasa Photo Media Association (TPMA). 

I kainoi Tiprasa koktma bodol bai saklaijakmanino khaphurjagoi loge ronani bagoi Tripura hasteni kabangma amchaini Tiprasa Press Clubni bwkhaktwi Press Release khlaijakkha.

O kainoi koktma bodol bai saklaijak koktma auaimwngno khaphurgwi chubanani kok saka haste beremni Tiprasa Press Club 'Khumulwng Press Club'. 

Ibo simingya, Khumulwng Press Clubni bwkhaktwi khajak aro gosemwng majak Ampi Press Club, Hezamar Press Club thangnai 23 August salmarigo aro Karbook Press Club, Khowai Tiprasa Press Club, Jirania Press Club thangnai 24 August salmarigo Press Releaseni bisingtwi Tripura Indigenous Peoples Press Association (TIPPA) bai Tiprasa Photo Media Association (TPMA) bai saklaijak Press Releaseno khaphurjakmani aro chubanani kokno saka.

Iboni olo tini phurungni 10:30 AM jorago hasteni Tiprasa kokthumnai, Kokborok Media House aro Youtuberrok Khumulwngni kokthum hukumu tangbedekni habanokni haplam baskango achoklai khorang tisalaikha.

Tripura Indigenous Peoples Press Association (TIPPA), Tiprasa Photo Media Association (TPMA)ni logego Khumulung Press Club, Kokborok Press Club, Ampi Press Club, Ambassa Tiprasa Press Club, Jampuijala Press Club,  Jampuijala Press Club, Khowai Tiprasa Press Club aro Hezamara Press Clubni adongrok TTAADC hapangni kokthum hukumu tangbedekni bwkhaktwi Advertisement rothanigo nini ani khlaijakmano khorang tisagwi TTAADCni Kokchap Nok baskango achoklaikha hasteni chorok kokthumnairok.

I kuthunaimwngo Khumulung Press Clubni twiphang Angsumoy Debbarma, tangphang Ranjit Debbarma, Tripura Indigenous Peoples Press Associationni twiphang Gautam Debbarma, Tiprasa Photo Media Associationni twiphang Biplab Kumar Tripura, aro chorok Press Clubni twiphang, tangphang song thangoi majakkha.

Tabok i patimwngno lagwi TTAADC hapang tma yapri seno, ibo naising naithai.

Satai klaiywk, i patimwngno lagwi Tiprasa Mediarok khorang tisamani olo thangnai 24 August salmarigo TTAADC hapangni kokthum hukumu tangbedek No.F.3 (23)/ADC/PO, ICA & T/2022/4490-500, Dated, 24/08/2023 meeting noticeni  bisingtwi saklaikha, phainai 28 August salmarini 3:00 PM jorago chorok Tiprasa koktmathungnairokno lagwi TTAADCni Main Administrative Buildingo kokmalama salaijaknai hinoi.