Tiprasa Mediarokni Jwngjalno Lagwi Kokmalama Salaini Achokkha TTAADC Hapang

29 August 2023, Khumulwng: thangnai salkisa sakango TTAADC hapangni katal advertisement policy snamjakya bade sakni muchutwi nini ani khlaiy...

29 August 2023, Khumulwng: thangnai salkisa sakango TTAADC hapangni katal advertisement policy snamjakya bade sakni muchutwi nini ani khlaiywi sai saiywi kisaswk media houseno advertisement romano lagwi TTAADC hapangni kokthum hukumu tangbedekni sakago barikhlai kok silchajakkha. 

Thangnai 25 August salmarigo hasteni Tiprasa Mediarok Khumulwngni Kokchap Nok baskango achoklai khorang tisalaimanibo nujakkha. Paithago i patimwngno lagwi Tiprasa Mediarok bai TTAADC hapang dadak-sidak khlai achoklai kokmalama salainai hinoi TTAADCni ojamarok bai kok rojakmani olo Tiprasa Mediarok lama achoklai khorang tisamanino rosagwi lago.

Iboni olo i patimwngno lagwi chorok Tiprasa mediarok bai gamkhlai achoklai kokmalama salainani bagoi thangnai 24 August salmarigo TTAADCni kokthum hukumu tangbedekni bwkhaktwi khlai No.F.3 (23)/ADC/PO, ICA & T/2022/ 4490-500, Dated, 24/08/2023 bisingtwi kaisa meeting notice rogoi saklaikha tini sareni damtham jorago TTAADCni Main Administrative Buildingni Conference Hallgo hasteni chorok Tiprasa mediarok bai achoklai kokmalama salainai hinoi.

Saklaijakmanitwi miyano i kokmalama pana songchajaknani tongmani, mator miya Kokborokno Roman Script bai gosemwng biywi TSF srwngnai bodol bai damchinoi jorani bagoi Tripura hastego bandh saklaijak tongmani bai miya kokmalama pana songchamaliya.

Paithago tini Tripura hasteni chorok Tiprasa mediarokno lagwi TTAADC hapang dadak-sidak achoklai Tiprasa media bai krwngjakrokni jwngjalno salainani bagoi kokmalama panago achoklaikha.

TTAADCni kokthum hukumu tangbedekni chariphang adong Suhel Debbarmani achokphang bai songchajak I kokmalama panago TTAADCni CEM Purna Chandra Jamatia, CEO C.K Jamatia, Chief Legal Advisor Data Mohan Jamatia, Kokthum hukumu tangbedekni PO aro hasteni kothe kothe Tiprasa Media bodol aro kokthumnairok phai majakkha. I kokmalama pana tabokbo songchajagoi tongwk.

Kha khlaiywk, I kokmalama panani bisingtwi TTAADC hapangni katal Advertisement Policy snamjaknwk aro koktmathungnairokni jwngjalno lagwi jai-jai khlai yak kakromanwk hinoi.