ASHA TRIPURA BUTHARJAKMANO JUSTICE NAIKHA TRIPURA DOPHANI NARAN

(File photo) 6 August 2023, Agartala:  thangnai 21 July salmarinigo Bangladeshni Asha Tripura (42) bwmwngoi khorokcha phrwngnaijwk uanamasan...

(File photo)

6 August 2023, Agartala: thangnai 21 July salmarinigo Bangladeshni Asha Tripura (42) bwmwngoi khorokcha phrwngnaijwk uanamasangsa aro kirimasangcha khlai butharjakkha. I butharjakmani patimwngno lagwi Bangladesh hagnangoi selengmwng phunujakkha aro justice biywi khorang tisajakkha.

Tabok i patimwngni justice biywi khorang tisajakma bana Bangladesh hagarago siming bathagoi tongliya, Bharatni Tripura dophani lukurokbo patimwngno selengmwng phunuka aro patimwngni uklogo sororokni yak krwngjak tongkhna, sororokni chukli swkjak tongkhna ibono kebeng kosongni bisingtwi gamkhlai naikolgoi patimwng bai krwngjakno krak majra ronanibo khorang tisajakkha.

Iboni bisingo i patimwng patimani olo Bangladesh hagarani kabangma Mothani bwkhaktwi i patimwngno selengmwng phunugoi aro justice biywi khorang tisalaikha.

Paithago Asha Tripura butharjakmani i krimasangcha aro selengmasangcha patimwngno lagwi khorang tisaka, Tripura dophani jotonislai gara aro kuchuk achokthai daiyo achogoi Tripura dophano naikolnai NARAN boromgnang Birendra Tripura.

Thangnai 5 August 2023 salmarigo Bharatni Tripura hasteni NARAN POMANG ROAJA COUNCIL (A Non-political, Non-Religious Socio-Cultural Judiciary Organization of Tripura Society)ni phaichingtwi F.No.03/NPRC/Press Release/2023/24, Dated, Agartala, the 5th August 2023 nomborni Press Releaseni bisingtwi Asstt. Teacher Asha Tripura butharjakmani patimwngno selengmwng phunuka aro patimwngno gamkhlai naikolgoi patimwng bai krwngjakrokno krak majra ronani bagoi Bangladesh Police authorityno haiyokkha. Butharjaknai nukhungni borokno khakhammwng phunuka aro Asha Tripurani phala tongkachang khlai tongmanthwk hinoi usrika.

Tripura dophani NARAN boromgnang Birendra Tripura Press Releaseni bisingtwi saka--

It's seen through various social media and electronic media of Bangladesh that Ms. Asha Tripura, an Assistant Teacher of  Primary School under Matiranga Upazila, Khagrachhari District, Bangladesh, has been murdered in her rented house on 21 July 2023.

We strongly condemn the such type of incident as pre-planned murdered. 

We appeal to the authority of Bangladesh Police for the proper investigation and to be punished the culprits as per court of law. 

We heartfelt condolence to her bereaved family members and pray to God her departed soul rest in peace.

With regards 

(Shri Birendra Tripura) 

NARAN 

Chieftain of the Tripura Society

Iboni sakango i patimwngno lagwi Bangladesh hagarani kabangma motha, sijak-nujak okra-chakrarok social mediani bisingtwi, Press Releaseni bisingtwi khorang tisalaikha aro justice bilaikha. Kokthungo sagwi manmanitwi, thangnai 24 July salmarigo Bangladesh hagarani Tripura dophani srwngnairokni bodol Tripura Students' Forum, Bangladesh, Central Committee Press Releaseni bisingtwi Asha Tripura butharjakmani patimwngno selengmwng phunuka aro kha khammani kokno saka. I patimwngno gamkhlai naikolgoi patimwng bai krwngjakrokno krak majra ronani bimwng tisaka.

Thangnai 26 July salmarigo i patimwngni justice biywi Bangladeshni kabangma bodol aro kabangma sijak-nujak lukurok lama akholai khorang tisalaikha. Khagrapur Mohila Kalyan Somiti, Women Activist Forum, Women Resource Network aro YWCA bodolni bwkhaktwi Khagracharini Shahid Meenar baskango thainchakhlai butharjakmani justice biywi khorang tisalaikha.

Thangnai 28 July salmarigo Press Releaseni bisingtwi Bangladeshni 'Chittagong Hill Tracts Writers' Union' i patimwngno selengmwng phunuka aro barikhlai kha khammani kokno saka. Ibo simingya, Unionni phaichingtwi i patimwngno gamkhlai naikani khlaiywi patimwng bai krwngjakno krak majra ronani bagoibo bimwng tisaka hapangni daiyo.

29 July salmarigo thainchakhlai Press Releaseni bisingtwi 'Bangladesh Government Primary School Headmaster Samiti, Khagrachari District Branch' aro 'Bangladesh Primary Teacher Samiti, Khagrachari District Branch'ni bwkhaktwi khakhammwng, selengmwng phunuka aro patimwng bai krwngjakno krak majra ronani bagoibo khorang tisaka.

Thangnai 30 July salmarigo Asstt. Teacher Asha Tripura krimasangcha khlai thwimanino justice biywi CHT Women Activist Forum aro Progressive, SK Building, Banrupa, Rangamatini thainchakhlai khorang tisalaikha. O salni phurung damchisa jora atlogo Rangamatini DC Office baskango CHT Women Activist Forum aro brwi ojama Tuku Talukdarni achokphang bai i panago kok sagwi khanarokha National Human Rights Commissionni kacham adong Nirupa Dewan, Rangamati Garjantali Mohila Samitini twiphang Sagarika Roaja, Rangamati Sadar Upazila Parishadni Vice-Chairman Nasrin Islam, Rangamati Public Collegeni Lecturer Mukul Kanti Tripura aro kabangma okra-chakrarok.

Koklarwknairok saka, chwng naimwthangni sakago paitokmwng tongwk. Naimwthang bodol poilani siming gamkhlai nangkhrugwi i patimwngno naikolgoi tongwk. Chwng naimwthangni bisingtwi i patimwngni kwbwi kwbwi koktma sinani naiywk. Asha Tripurani bwsaino naimwthangrok gamkhlai kok swngni ongthwk. Tmwi hinba Asha Tripura thwiphugo bwsai Uddipan Tripura simingno nogo tongwk. Aini bagoi bo sinai Asha Tripura bai tma patimwng patikha. I patimwng bai krwngjak chorokno kerongraidatwi krak majra ronani aro thwinai Asha Tripurani postmortem report daktwi ronani bagoi hapangno haido khlaika kok larwknairok.

Justice biywi iswk khorang tisajakmani olobo Asha Tripura butharjakmani tinibaikhai salchidok kakha mator tabokbo i patimwngni justice mayakho butharjaknai nukhungni borokrok. Basai Uddipan Tripurano Police romphabo iswk gamkhlai kokswngyani bagoi patimwngni kwbwi koktma sagwi maya ongoi tongkha. I patimwngno ereng ereng khlainani bagoi bodolsa themrangrok rangkho-pwichani batailaimwngo akholaijakpho hinoi social mediani bisingtwi barikhlai kok silchajakmani nujagwi tongwk. 

Iro Khurchathai klaiywk, Khagrachari Districtni Matiranga Upazilani Tapta Master Para Govt. Primary Schoolni Asstt. Teacher Asha Tripura bo basai Uddipan Tripura aro basa khoroknoino lagwi tongkwchangni bisingtwi Khagrachari dolini Mahajan Parago nokchorai tongoi tongwk.

Mator Thangnai 21 July salmarini phurung atlogo Asha Tripurani mangkwthwino makha twikuthainogo. Poilago nukhungni borokrokni bwkhaktwi sajakkha mokhra (heart attack) ongoise Asha Tripurani langma chogwk. Mator olo nok korekarani borokni khugo, amchaini borokrokni khugo aro social mediani bisingtwi koksilchajakkha, Asha Tripurano agebariyani siming juk raiywi ebakhlai pre-planned khlai buthajakkha. Bini basak, bokhorogo butok khlaijakmani mari gnang pilik social mediago barikhlai lokkha (viral). 

(Social Media viral photo)

I patimwngno lagwi langma chonai Asha Tripurani bata Khagrachari Police Station daiyo kaisa FIR khlaijakkha. FRI khlaijakmani bisingtwi i patimwngno naikolni thangtanigo patimwng bai krwngjak ongmago ibotwi mwkchwngwi langma chonai Asha Tripurani basai Uddipan Tripurano romkha Bangladeshni Police. Tmwi hinba Asha Tripura thwiphugo bana bwsai simingse nogo tongphwk hinoi koktma. Aini bagoi Asha Tripura braikhlai thwika, tmwi thwika, tma ongoi thwika i koktma bana bwsai simingse sagwimanai. 

Khorokcha brwi, khorokcha boma, khorokcha bihik ongkha dophani sinimwng. Brwirok krwikhlai nukhung krwi, dopha krwi, ha krwi. Uansokthai, Asha Tripura bo bana Asstt. Teacher simingya, bo khorok dopha, hodano rwngwi larwknai, dophani sajwk. Bono ibotwi khlai uansogoimaya, paitogoimaya, krimasangcha khlai butharjakmani patimwng ibo kwbwino justice mani nangwk. Bwsai Uddipan Tripura tabok Police bai romjakjak. Ibotwi jorago thwijak Asha Tripurani basa khoroknoini thinang tma ongnai, bokni pora-lekha khlainani barja soro lanai ibotwiroknobo uansokthai Bangladesh hapangni phaichingtwi. Aini bagoi jeswkkhlaiphabo Asha Tripura butharjakmani justice manani nangwk hinoi lukurokni khorang aro bimwng.