Hohom-Dodomni Bisingtwi Songchajakkha Kharchi Matai Ter

26 June 2023, Agartala: takhlaini Kharchi Matai Terno chengoi rokha hasteni montriokra Prof. (Dr.) Manik Saha.

Narui ongoi phai majakkha hasteni Tribal Welfare montri Bikash Debbarma, montri Sushanta Chowdhury, MLA Swapna Debbarma, AMC-ni Mayor Dipak Majumder song.

Takhlaini Kharchi Matai Terno hohom-dodomni bisingtwi palaikha Tripur Kshatriya Samaj. Tripur Kshatriya Samajni kainoi bodol kothe kothe jegago pana songchagoi i terno palaikha. Bodol kaisa Tripur Kshatriya Samaj Khayerpurni Geetbeetan Community Hallgo 'Kharchi Ter-1433 Tripura Bisi' songchakha aro bodol kaisa Agartalani Town Hallgo hani bobagra Pradyot Kishore Manikyani yaktoi Tiprasa Hodani Hoda okrarokno lagwi hohom-dodomni bisingtwi palaikha.

Takhlaini sirisitini Kharchi Matai Terni poila salgo hani bobagra Pradyot Kishore Manikya Khayerpurni chibrwi matainogo thangoi matai khulungthangka aro hasteni lukurokni gamkrwng, tongkwchang biywi usrika.

Kharchi Ter rwgwi Tripura hasteni takhu-bukhu songno khagam yapharka aro chorokni sakgam, hamkrai, tongkachang tongnani bagoi mataini daiyo usrika Barotni Union Home Minister Amit Shah. Bo social mediani bisingtwi saka, 

"Greetings to my sisters and brothers in Tripura on the occasion of Kharchi Puja. May the almighty, bless everyone with good health, success, and prosperity.

খার্চি পূজার এই শুভ মুহূর্তে আমি ত্রিপুরার প্রত্যেক ভাই বোন কে জানাই অনেক অনেক শুভেচ্ছা। পরম ঈশ্বরের কাছে প্রত্যেকের সুস্বাস্থ্য, উন্নতি ও সমৃদ্ধি কামনা করছি।"

Kharchi Matai Tergo thangoi matai khulungthangka aro hasteni lukurokni gamkrwng tongkwchang tongnani bor biywi usri thangka Lok Sabha salka Tripura achokthaini MP Rebati Tripura.

Kharchi Matai Ter rwgwi TTAADC hapang, TTAADCni Chief Executive Member, haste hapang, hasteni montriokra, kothe kothe khlai hasteni lukurokno hamjakma yapharka aro lukurokni tongkwchang-chakwchang twbwithwk hinoi usrika.

Kharchi Terno baksaba Chibrwi matai ter hinoibo salailaiywk aro sinilaiywk. 

Kharchi Matai jabwiyi Tiprasani sirisitini kaisa mataigara hinoi manejagoi, palaijagoi phaika Tripura hani bobagra molni siming. Mator Kharchi Matai Ter tabok bana Tiprasarokni ter hinoi bathagoi tongliya, ibo Tripura hasteni kaisa tergara hinoi bisipoti hohom-dodomni bisingtwi palaijagoi tongwk. Bisi kabangma sakangni jiming i ter rwgwi haste hapang salchani habalengkhomabo saklaijak.

I Kharchi Matai Terno bobagrarokni raida rwgwino songchajagwk aro palaijagwk. I terno songchakha Tripura haste hapang aro i ter phainai salsni jora rwngoi hohom-dodomni bisingtwi cholenai.