Independent Batainai Purushottam Roy Barmanni Chongbarini Auaimwngo Bobagra Pradyot Kishore Manikya

13 February 2023, Agartala: politics daiyo  phariya hinoi krwi. Ongya hinoibo krwi. Muchumanibo ongwk gothemanibo ongwk. Tini minijak khna k...

13 February 2023, Agartala: politics daiyo  phariya hinoi krwi. Ongya hinoibo krwi. Muchumanibo ongwk gothemanibo ongwk. Tini minijak khna krajak, tini phikong yak boklaijak khna mwkhang naiswklaimiya ongjak. Politics daiyo uanagwibo kul paiya miniywibo kul paiya. 

Ibotwijati uanajaknai mandwi tini nujakkha 2023 Tripura Legislative Assemblyni chongbari rwgwi auaimwng daiyo. 7-Ramnagar chongbari achokthai daiyo Independent ongoi chongbarigo batainai Adv. Purushottam Roy Barmanno chongbari rwgwi songchajak sare jorani auaimwng panago phaiywi majakkha Tipra Mothani kasku ebakhlai bobagra Pradyot Kishore Manikya.

Purushottam Roy Barman bo Independentni ongoi bachaphabo Left-front-Congressni kwthalaijak bodol bono support khlaiywi paijak. Aini bagoi 7-Ramnagar achokthai daiyo Left-front-Congressni kwthalaijak bodol aro Candidate roliya. Iboni bisingose tini independent ongoi batainai Purushottam Roy Barmanni chongbarini auaimwng panago thangoi majagwi chongbarini paimwng-chenmwngno barikhlai kuthugo kakhogwi rothangka. 

7-Ramnagar achokthai daiyo BJPni ongoi bataikha MLA Surajit Datta aro Trinamool Congressni ongoi bataikha Pujan Biswas. Bok chlaktham candidate kaisani slai kaisa batailai auaimwngo akhojak. Ibotwi jorago independentni ongoi batainai Purushottam Roy Barmanni chongbarini auaimwngo bobagrani support khlaimani Tripurani politicalni noba bwjang silangno ibo 2nd February salgose sinai.

Aiphabo independent batainai Purushottam Roy Barmanni chongbarini auaimwngo bobagrani manjakmwng ibo hapang BJP bodolni bagoi kaisa uanajaknai aro Left Front-Congress kwthalaijak bodolni bagoi khatongjaknai hinoi sijak nujak lukurokni uansokmwng !