31 January 2023, Sabroom: phainai 2 February nomination tisagwi lajaknai paithak sal. Iboni bisingono Tripurani politicsni nobar jephruphan...
31 January 2023, Sabroom: phainai 2 February nomination tisagwi lajaknai paithak sal. Iboni bisingono Tripurani politicsni nobar jephruphano slaijakmanwk.
Tini 40-Sabroom Assembly chongbari achokthai daiyo batainai CPI(M) bodolni batainai machang Jitendra Chaudhury kaisa jegago chongbari auaimwng khlaiphugo koklarwkthanigo Tipra Motha bai aphak onglainani kokno khurchagoi saka. Tipra Motha bai CPI(M) bodolni bisingo bising bising chubalainani hinoi salaimani kokno khuk khengoi rokha. Ibo simingya je je achokthai daiyo CPI(M) bodol krak batainai nomination rojak o achokthai daiyo Tipra Motha chubachu ronai aro je je achokthai daiyo Tipra Mothani chubachu nango o achokthai daiyo CPI(M) bodol chubanai hinoibo kok salaika.
Machang Jitendra Chaudhury koklarwkmani kachargo saka ibotwikhlai--
"Chwng bana Congress bai simingya, Tipra Motha baibo kokmalama onglaidok. Nohk koktma balairogo nukhna, Tipra Mothabo 40-42 achokthai daiyo bokni batainairok nomination blai yapharlaijak. Tini phurung atlogo Tipra Mothani kasku boromgnang Pradyot Kishore Manikya ano phone khlaijak, ano saka, nwng kaplai ongnai! Tipra Mothani adongrok chorok nono vote ronai.
Ang swngka, Sabroomgo tmwi candidate roliya? Pradyot Kishore Manikya saka, Jitendra Chaudhuryno kosol candidateno kebengoi ang candidate romaya!
Ang aiphu bono saka phurung atlogo, Jitendra Chaudhury kabangma achokthai daiyo BJPno mechenmano, chwng naiywk aro kabangna achokthai daiyo Tipra Motha bai chini kokmalama onglaithwk!
Bo ano saka, ano arokisa jora rodi, tini sareni bisingo nono ani bo bo achokthai daiyo krak krak batainai tong o daiyo nohkni chubachu binai, nwngbo jai khlaidi bo bo achokthai daiyo chini Tipra Mothani batainaini bwmwng tisani nango iboni bwtang snamdi chwng achoklainai, 2 Februaryni bisingo jai khlailainai".
Tabok CPI(M) Tripura State Secretary ebakhlai 40-Sabroom achokthai daiyo batainai machang Jitendra Chaudhuryni ibotwikhlai Tipra Motha bai halok bogwi chongbarigo chubalainani kok samani ibo chongbarini jorago Tripurani politicsni bechebo jesa bodolni bagoi kaisa challenge.
Iboni sakango miya CPI(M) Tripura State Secretary Jitendra Chaudhury sraichakhlai samani tongwk je, tomwng Congress bodol kaitham achokthai daiyo bokni nomination rwksaya hinklai CPI(M) kaidokchi (60) achokthai daiyo batainai. Tomwng Congress bodol kaitham achokthai daiyo nomination romani rwksagwi lago hinklai CPI(M) bodolbo aro kaichichar (18) achokthai daiyo nomination romani ibono rwksagwi lanai hinoi.
Iboni bisingose CPI(M) Tripura State Secretary Jitendra Chaudhury tini Tipra Motha bai halok bonani bagoi bising bisingo kokchaplaimanino khuk khengmani bai Tripura politicsni hapar barikhlai challengeni sakago challenge khlaimani nujagoi tongwk.
Tripura hagirago Congress bodolni phran krwino hinoimano. CPI(M) bai Congress bodol aphak ongmani olo CPI(M) kaichitham achokthai Congress bodolno yakagwi rojak. Mator Congress bodol aphak onglaimani raidano sabaiywi kaichisni chongbari achokthai daiyo batainani hinoi candidateni bwmwng saklaiywk. Irono phekra onglaikha Congress bai CIP(M)ni bisingo. Kainoi bodolbo jani jani independent candidate nomination romanino rwksagwi lalaiani hinoi salaijak tomwng aphakni kokromano manelaiywi tonglaikha hinklai.
Ibotwi jorago se CPI(M) bodol bai Tipra Mothani bisingo chubalainani hinoi bising bising kokchaplaimano khuk khengoi romabai jesa political bodolni daiyo uansokjaknai ongoi phaika. Sani thangklai i Assembly chongbarigo BJP, CPI(M), Tipra Motha hapango achokthanio kaisa bai kaisani phran chubalainani nangwk ibo arouaisa sraicha ongkha.
No comments