18 January 2023, Agartala: jesa bodolni bagoi phainai 2023 bisini Tripura Legislative Assemblyni chongbari barikhlai nangmani. Aini bagoi ch...
18 January 2023, Agartala: jesa bodolni bagoi phainai 2023 bisini Tripura Legislative Assemblyni chongbari barikhlai nangmani. Aini bagoi chorok political bodol soroni slai soro lukurok bai gam halok bomano ibono jani je pharitwi phran phunulainani chenglaikha.
Ijang TIPRA Mothabo kaisa regional party ongoi 'Greater Tipraland' bimwng aro thainchani khorang bai poila chongbarigo bataiywi kaplai ongoi TTAADC haphango achokkha. Haphang achogoi TTAADC Kokchap Nokni poila achokmwngo 'Greater Tipraland'ni resolution pass khlai rokha. Tabokkhlai Tipra Mothani naikhomwng ongkha 2023 Tripura Legislative Assemblyni chongbarigo bataiywi kaplai ongnani.
Tipra Motha 'Greater Tipraland' bimwngno baskango larogwi bobagra ebakhlai Tipra Mothani kasku Pradyot Kishore Manikya tabok Tripura hani habasarokno thainchani lamago twbwiywi habasarokni mathai-soktaini paithak choba hinoi saklaiywi bodolno krak khlaini chengkha, tlwk tlwk bodolbo krak ongoino tongwk.
Tipra Mothani tabok chakli-sikla motha Youth Tipra Federation (YTF), brwirokni motha Tipra Women Federation (TWF), sebok khlainairokni motha Tipra Employees Federation (TEF), Tipra Indigenous Students' Federation (TISF), Buma Bodolno kosol tongwk bedek bupra erjak.
Tipra Motha daiyo poilani siming hanibasa Tiprasarokni badebo musma, hindustani, uanjwi, manipuri dophani borokbo tongwk.
Tabok aro kaisa katal motha khajakkha Tipra Citizens Federation (TCF). Iborok chorokno Tipra Mothani bedek. I TCF khajakmani olo uanjwi dophani lukurokbo Tipra Mothani bana rwngnani chenglaikha dari dari khlai. Tabok chongbari smarorwk Tipra Mothago uanjwi dophani lukurokni yapri semanibo bangrorwk ongoi tongmani nujagoi tongwk.
Miya Rajbarigo Tipra Mothani Mega Joining programno rwgwi songchajak koktmathungnai panago 145 uanjwi nukhungni 2000 voter kothe kothe bodol yakagwi Tipra Mothani bana rwngphaika. Bobagra Pradyot Kishore Manikya khatong khajani bisingtwi Tipra Mothani bana rwngrogwi katal votersrokno bodolgo lamjokha. Uanjwi dophani iswk kabangma katal voterrokno bodolgo lamjomani bisingtwi Tipra Motha baskangni Assembly chongbarigo ST achokthaini badebo aro jesa achokthai daiyo batainani phran ongoi bachakha. I phran phainai Assembly chongbari daiyo haphang BJP bodolni bagoibo kaisa uanajaknai aro uansokjaknai kok.
Bobagra jora kalokma rwngoi sagwi phaiywi Tipra Motha kaisano hamya khlaini bagoi songchajakya. Tripura hani habasarokni mathai-soktaino manani bagoise khorang tisagwk. Hindu, Christian, Buddhist kaisa tongkatharno kebengnani bagoiya, uanjwi, manipuri, hisdustani, musma kebono kebengnani bagoiya, chorok tongkathar chorok dophani hamkraini bagoise Tipra Motha songchajagwk. Bobagra iswk jora kalokma rwngwi i kokno sagwi phaimani ibo miyani koktmathungnai panago 145 uanjwi nukhungni 2000 voter Tipra Mothani bana rwngphaimani bisingtwino sraicha ongkha.
Miyani koktmathungnai panago phaiywi Tipra Mothago joining rophainairokni bisingo tongo- CPI(M) bodolni Tripurani kacham montri Anil Sarkarni basala Abhijit Sarkar, BJP Kishan Morcha Tripura State Committee Secretary Tapan Sinha, NCP bodolni kacham twiphang ebakhlai Lok Sabhani batainai Ramu Parik, Majlishpur Assembly chongbari achokthaini 2018 chongbaribo INC bodolni batainai Rajib Gope, Yuva Congressni kacham twiphang yakchu Juhi Rani, 6-Agartala achokthaini INC bodolni kacham twiphang Biswajit Deb, Kakraban Assembly chongbari achokthaini CPI(M) bodolni tangphang Uttam Sarkar, 7-Ramnagar BJP bodolni twiphang yakchu Parsatha Chakrabortyno lagwi aro kabangma uanjwi bosongni politicalni tangkrarok.
Tabok iro lukurokni daiyo kisisa swngmwngbo kasai tongo, Tipra Motha achaiywk 'Greater Tipraland' bimwngno lagwi. Hinklai taboksa je dari dari khlai uanjwi bosongni borokrok Tipra Mothago yapri rophainairok bokbode khabai khukbai Tipra Mothani 'Greater Tipraland' bimwngno chajagoi, gosegoi lalaikhna? Ebakhlai bana phainai Assemblyni chongbarigo SC, General achokthai daiyo batainani sep lanani bagoide phailaikna? Ibotwi swngmwng tabok thare bareno salaimani khnagwk.
Tomwng uanjwi dophani lukurok 'Greater Tipraland' bimwngno khabai khukbai chajagoi, gosegoi Tipra Mothago yapri rophaiywk hinklai ibo Tipra Mothani bagoi, Tiprasarokni bagoi barikhlai gam koktma ongmanai.
Miyani i koktmathungnai panago phaiywi majakjakha bobagra ebakhlai TIPRA Mothni kasku Pradyot Kishore Manikya, Tipra Citizens Federationni convener kacham MLA Tapas De aro TCFni adongsong.
No comments