Omonode Hin Thaincha?

29 January 2023, Agartala: Tiprasarok khugo salaiywk thaincha, Greater Tipraland bimwngno lagwi last fight, bobagrano khairokjadi hinoi. Mat...

29 January 2023, Agartala: Tiprasarok khugo salaiywk thaincha, Greater Tipraland bimwngno lagwi last fight, bobagrano khairokjadi hinoi. Mator i thaincha thaincha hinoi salaimani bakhabaide sa na bana khuk bai sa, ebakhlai i thaincha baswk joratwi kwbwi kwkrwk ibo tabokse sraicha ongsiywk.

2023 Tripura Legislative Assemblyni chongbari saklaimani olo seatno lagwi Tipra Mothani bisingo kokbanglaimani, khadulaimani tabok sraicha khlai koktmago kasajak. 

Taboksa salnoi saltam jora rwngwi Tipra Motha bana candidateno lagwi barikhlai kok banglaimani nujagoi tongmani moko dak dak khlai nujagoi tongkha. Chongbarigo nomination blai yapharjaknai paithak sal ongkha khna ebakhlai 30 January. Mator tabokbo Tipra Motha chorok candidateni bwmwng saklaiywi malaiyakho.

Miya horni damsa jora atlogo kaidokchi (60) Assembly achokthaini bisingo bana kainoichi (20) achokthaini batainairokni bwmwng simingse saklaimakho. Mandainagar, Raima Valley, Manu arobo kabangma achokthai daiyo batainairokni bwmwng saklaijaknai tongkho hinoi koktma.

Tini phurungni siming lukurok Rajbari kore karago joma khlai kuthunglaiywi naisinglaijak aro saklaijakya tongmani achokthairogo baiphu candidateni bwmwng saklaino hinoi. Mator tabokbo saklaijakyakho. Bari uanamasangcha.

Iboni bisingo koktma kasai phaika, Mandainagar (ST) achokthaini lukurok huijak koktmani bisingtwi sagwi makha, o achokthai daiyo MDC Runiel Debbarmase candidate ongnaiphwk hinoi. Ibono lagwi amchaini lukurok chajakya onglaiywi Mandaini Gourmani Stadium daiyo kuthunglaiywi khorang tisalaikha Tipra Motha Mandai Block Committeeni ojamarok. Bokni kaisano kok, Mandai amchaini jesanophano candidate rokhlai bok gosegwi lanai. Mator MDC Runiel Debbarmano gosegwi lamaglak. Tmwi hinba bo MDC ongmani olobo amchaini lukurokbai malaiya hinoi kok silchakha.

Ibo simingya, buma bodolrokbo brwirokni seat bangroi maronai hinoi bobagrani daiyo seat binani phailaijak.

Ibotwi haiklai kaisa kaisa Assembly achokthai daiyo candidate biywi kokbanglaimani thaklaiyakho. 

Tomwng khugo bobagrani thainchano naiywi, Tiprasarokni mwthangjaknani bagoi Greater Tipraland bimwngni last fight naiywk hinklai tmwi iswk achokthaino seklailang? Achokthaide gara dopha gara? Ibo tabok gara khlai swngmwng kasajak hagnangoi.