21 January 2023, Agartala: 19 January sopaikhlaino bisipoti Tripura hapang aro TTAADC hapang rang lac lac sbaiywi hohom dodom khlai palaiywk...
21 January 2023, Agartala: 19 January sopaikhlaino bisipoti Tripura hapang aro TTAADC hapang rang lac lac sbaiywi hohom dodom khlai palaiywk 'Kokborok Sal'.
Tabok sini nangwk Kokborok Sal tmano hin?
Tripura hani kabangkuk borokrok Kokborok bai kok sagwk. Tripura hani laibuma rwgwi haikhlai Kokborok kok Tripura kok hinoibo sinijagwk. Tripura hago bobagrani molgo Tripura kokno Rajbasha hinoi snamyagwi Bangla kokno snamkha Rajbasha. Aiphuni siming Tripura kok sajakya suijakya ongmani bagoi kamanani kwmwknani chengwk. Tripura hago bobagrani mol paiywi lukuraida phaimani olo sakni amani kokno Tripura hapangni kok hinoi goseroni bagoi jora kalokma choba khlaimani olo paithago 19 January 1979 AD bisigo Tripura Legislative Assemblygo 'The Tripura Official Language (Amendmend) Bill, 1979 (Bill No.1 of 1979) pass khlaimani bisingtwi Kokborok (jabwio Tripura kok tongmani) kokno Tripura hapangni kok hinoi gosegwi lagwk. Aini bagoi i 19 January salmarino mwito larwkni aro borom roni bagoi 2001 AD bisigo poila 'Kokborok Gosejakma Sal' hinoi palaini chengwk. Poila poilago ibono NGO rokse palaiywk, tabokhlai ibono Tripura hapang, TTAADC hapangni bwkhaktwi palaijagwk. Tabok i salno palaini bagoi Tripura hapangni Finance Departmentni simingbo kothe khlaiywi budget snamjagwk. Bisipoti i salno palaini bagoi lac lac rangbo sabailaiwk. Kokborok bai suinai-khainairoknobo borom rojagwk, dason ephajagwk.
Mator, i sal palaiphugo tmwi Dhananjoy Tripurano borom rojakya? Tmwi Dhananjoy Tripurani bwmwngno khujakya, chejakya-phwkjakya ? I kokbo jonom kasagwk.
Dhananjoy Tripuralai soro onglang?
Tripura kok (tabok Kokborok) Tripura hapangni kok hinoi gosegwi lajakni bagoi Tripura hani habasarok jora kolokma rwngwi choba khlaithanigo jeni khaklapni thoi hago kochokni nangkha, jeni langma chonani nangkha bo ongkha Dhananjoy Tripura.
Dhananjoy Tripurani langma romani bisingtwi tini Kokborok Tripura hapangni kok hinoi gosegwi lajagoi tabok bisi brwichibago yapri seka.
Sukrugwi sani thangklai Tripura hago bobagrani mol paiywi lukuraida phaimani olo hanibasarok kabangma jwngjalni yakakni bagoi lamago akhogwi chiriklaini nangkha. Aiphugo Tripura hago Congress bodol hapango achokjak. Congress hapangni jorago Tripura hani habasarok Bangladeshni Hindu uanjwirokno refugee ongoi phaiphugo jega rokha, bobagra bai khagwi klangjak reserved forestno sabaiywi rokha, Dumbur hydroelectric projectni bagoi Gomati harungni lukurokni jegago phran bai kobai khlai segwi lakha. Ibotwikhlai aiphugo Tripura hani habasarokni langma barikhlai klaijak jwngjalgo.
Tripura hani habasarokni ibotwi jwngjalni jorago Tripura ha gnangoi chobago akhoka lukurok. Chini hano chwngno pherogwi maronai, amani kokno hapangni kok hinoi gosegwi malanai ibotwijati porbrwi bimwngbai choba gara khlai ongkha aiphuni South Tripurani Jolaibarigo. Sal ongkha 3rd March 1975 AD bisi. Ha gnangoi 144 kerongraida phnangjak tongmani bai sai-sai lukurokni kuthungmwngni chobago naimwthangrok phekra onglaini nangkha. O salni choba iswkno gara ongkha naimwthangrok lukurokno mwphwngni bagoi raidangbai saprakkha, silai guli kokkha. Irono naimwthangni silai guli kolsa nangoi hago luti klaiywi langma rogwk Dhananjoy Tripura bwmwngoi bisi thamchiba omorni khorokcha chaklisa. Bini logego Mohini Tripura bwmwngoi aro khorokcha sago silai guli nangjak. Bo olo sakgam nogo thangoi langma chophwk hinoi koktma. Aiphugo Dhananjoy Tripurano langma chomani nugoi luku kuthungmwngo majakjak sai-sai lukurok sata-sita khlai khabrulaikha. O choba ongkha amani kokni bagoi Tripura hago songchajak jotoni slai gara khlai songchajak mwito larwkjaknai kaisa choba.
Iboni olo bisibrwi jora tongoi Tripura hago yaksibodol hapango achokgo. Achogoi Kokborokno Tripura hapangni kok hinoi gosemwng rogo 19 January 1979 AD bisigo. Ibo haiklai Tripura (tabok Kokborok) kok hapangni gosemwng manani bagoi poila langma rolangjakha Dhananjoy Tripura. Bini langma, khaklapni thoibai tini Kokborok kokbai University berem jorago poreni sep makha, Ph.D khlainani sep makha.
Mator kha khamjaknai kok ongkha, Dhananjoy Tripura je kokni bagoi langma rolangkha o kokbai komsanai lukurok Dhananjoy Tripurano kisabo borom rolaimani nujakya. Bari uanamasangsa.
Iro satai klaiywk, bana Tripura hani yaksibodol simingse Dhananjoy Tripurano borom rogoi bisipoti 3rd March salmarigo bini thwimani sal hinoi Tripura ha gnangoi palailaiywk. Yaksibodolni bade tabok sakno thaincha thaincha hinoi kok gara gara salainai sijak-nujak lukurok Dhananjoy Tripurano borom rolainanilai langchani kokse, Dhananjoy Tripura soro ongkha ibono gnangse gamkhlaiywi silaiya. Ibo Tiprasa hinoi sak sakno bukhung chukjaknai, thaincha hin sanairokni daiyo barikhlai lachimasangcha.
Tabok bisipoti 19 January salmarigo Tripura ha gnangoi 'Kokborok Gosejakma Sal' (baksaba palaiywk Kokborok Sal) palaijagwk. I salgo tongthoklaiywk chathoklaiywk. Baksaba hante-hante ri-chung kangwi-chungwi pilik tisalaiywk, social mediago upload khlailaiywk, statusgo rolailaiywk. Mator o salgo sakni khaklapni thoi rolangnaisa Dhananjoy Tripurano kisabo borom ronani uansoklaiya aro borom romani nujakya !
Paithago i kokno sani naiywk, Kokborok Gosejakma Sal (baksaba Kokborok Sal hinoi palaiywk) palaimani salgo Dhananjoy Tripurano khumtrang kangrogwi khulungmani bisingtwi borom yapharni nangnai. Dhananjoy Tripurano chorok lukurokni daiyo bwkha larwkroni bagoi kok-kokrabaini samwng homwng tangnairokno 'Dhananjoy Tripura Mukumu Dason' yapharmani nangnai. Pharikai Tripura hapang Dhananjoy Tripura thwima salno borom rogoi salchani habalengkhoma roni nangnai. Lama lampra daiyo Dhananjoy Tripurani mangthong achokroni nangnai, bwmwng pharni nangnai. Tomwng Dhananjoy Tripurano ibotwi haiklai borom rolaimakhlai Dhananjoy Tripurani sinimwng aro bini laibuma thwiyasakni chorokni bakhago mwito larwkjaknai. I mwito larwkjakmani bisingtwi bini phala tongthokma manai.
No comments