HERITAGE VILLAGENI BAGOI KAINOICHINOI TIPRASA DOPHANO HA BAKGWI ROKHA TTAADC HAPHANG

17 January 2023, Khumulwng : Tipra Motha TTAADC haphango achokmani olo Tiprasa Communityrokno bokni customary law court snamni, aro communit...

17 January 2023, Khumulwng: Tipra Motha TTAADC haphango achokmani olo Tiprasa Communityrokno bokni customary law court snamni, aro community thogwi bokni habanok snamni bagoi Khumulwngo Heritage Village snamni yapri seka.

I Heritage Village daiyo Tripura hani kabangma Tiprasa Hodarokno TTAADCni Head Quarter Khumulwngo jegabo ronani chengkha.

Hani Bobagra ebakhlai TTAADC-ni Administrative and Reform Committeeni kasku machang Pradyot Kishore Manikyani chaitokmani bai TTAADC Tipra Haphangni bakhaktwi miya Khumulwngni Nuai Auditoriumgo songchajak kaisa panani bisingtoi poila bwkhakgo Tripura hani kainoichinoi Tiprasa Dophano jega ebakhlai ha yapharmani balai tisagoi rokha.

Tripura dophani Naran machang Birendra Tripurano ha bakgwi romani balai tisagoi rokha bobagra Pradyot Kishore Manikya

I panani achokphang ongoi achokkha TTAADCni LRS bedekni chariphang machang Bhaba Ranjan Reang.

Panano lamjogoi koklarwkha TTAADC-ni habanok chariphang okra machang C.K Jamatia, IAS. Panago phaiywi majakkha TTAADC-ni chariphang okra machang Purna Chandra Jamatia, sakgam bedekni chariphang machang  Kamal Kalai, AARC-ni adong machang Bijoy Kumar Hrangkhwal, Salthang Zonalni achokphang machang Ranjit Debbarma, kacham montri Mevar Kumar Jamatia, habanok chariphang okra yakchu Biddhilian Hrangkhwal,Salthang Zonalni ZDO Upendra Debbarma song.

I panano lagwi TTAADC haphangni Press Release

Bokni badebo I panago phaiywi majakkha Bongcher, Chakma, Charai, Debbarma, Garo, Hrangkhwal, Jamatia, Kalai, Lushai, Mog, Molsom, Murasingh, Noatia, Ranglong, Reang, Rupini, Tripura aro Uchai dophani hodaokra eba samajpati song.

O panago je dophani borok phaiywi manjakliya rokno olo rojaknai hinoi saklaijakkha. Panani paithago hani bobagrani twiphang bai ha bakgwi romani jegano thangoi nailaikha.