Manu Railway Station daiyo Tiprasani Hojagiri Masamwngno Hanang Pinang

Manughat, 13 October 2022: Tiprasani Hojagiri masamwngno chaiya chukya khlai mangthong buaijagoi hanang-pinang khlaijakkha Dolai Hangkorni M...

Manughat, 13 October 2022: Tiprasani Hojagiri masamwngno chaiya chukya khlai mangthong buaijagoi hanang-pinang khlaijakkha Dolai Hangkorni Manu Railway Station daiyo.

Koktmago sagwi majakkha, Barotni boromgnangjuk habokhorok Draupadi Murmuni yaktwikhlai Tripura hastego aro kainoi katal train chengywi rojago. Ibono rwgwi Manu Railway Stationno hantete khlaiywi sadejakkha.

Manu Railway Stationno Tiprasani masamwng ebakhlai Tripura hasteni hukumu Hojagiri masamwng bai naithotok khlai sadegwi mangthong achokrokha. Mator, jetwikhlai Tiprasarok Hojagiri masamwng masago ibotwikhlai masamwngni mangthong achokrojakliya. Achokrojakkha chaiya-chukya hanang-pinang koro-kuthu khlai Hojagiri masamwngni mangthong. Idaiyo achokrojakmani Hojagiri masamwngni mangthong ongkha kachargo khorokcha brwi bachajak, aro yagra yaksi khoroknoi brwi gola sakago ok phnangwi yago mairang twiwi yathwi-bokhorok sakago naisajak. Ibohaikai Tiprasarok uaisabo Hojagiri masamwng masamani nuyakho aro Hojagiri masamwng daiyo ibotwijati talbo krwi.

Manu Railway Station daiyo achokrojak Hojagiri masamwngni i mangthong social media daiyo lwkmani olo khakhammani bisingtwi Tiprasarok ibono lagwi khorang tisaka. Ibo Tiprasani hukumuno kuchugo tisanani bwmwngoi lachimasangcha khlaimanise khlaisiywk. Daktwi daktwi i chaiya chukya koro-kuthu ongjak Hojagiri masamwngni mangthongno konoroni ongthwk aro katal khlaiywi gamkhlai snamgwi Hojagiri masamwngni mangthong snamgwi achokroni ongthwk.

Hojagiri masamwngno chaiya chukya hanang-pinang khlaijakmano lagwi bobagra Pradyot Kishore Manikyaba khorang tisaka social mediani bisingtwi. Bo saka, "These insults will continue until we do not get our constitutional rights. We have negotiated our rights over dignity in the last 70 years and this is the result".

Tabok i Hojagiri masamwngni chaiya chukya mangthongno lagwi Tiprasa lukurokni tisajak khorangno Railway Bedekni ojamarok khnagwi baswk joratwi daktwi daktwi khlai kacham mangthongno konorogoi katal gam mangthong achokrono Ibo lukurok khalogwi naisinglaijak.