Agartala,14 October 2022: phainai 2023 Assemblyni chongbari jesa bodolni bagoi barikhlai nangnani. Iboni kachargo tongo TTAADC-ni Village C...
Agartala,14 October 2022: phainai 2023 Assemblyni chongbari jesa bodolni bagoi barikhlai nangnani. Iboni kachargo tongo TTAADC-ni Village Committeeni chongbari. Aini bagoi sakangbariya chongbarino lagwi jani jani bodolno krak khlaini chengkha hasteni kabamgma political bodol.
Ibotwikhlai BJP Tripura hasteni ojamarokbo achoklaiywk jonom. Miya 13 October salmarigobo achoklaikha BJP Tripura hasteni ojamarok.
Chongbarino lagwi, bodolni thinangni samwng-homwngno lagwi miyani i kokchaplaima panago phaiywi majakkha hasteni montriokra Dr. Manik Saha, BJP Tripura haste tangphang Rajib Bhattacharya, hasteni BJP Prabhari Dr. Mahesh Sharma, Phanindranath Sharma, hasteni kacham montriokra ebakhlai Rajya Sabhani MP Biplab Kumar Deb, Central montri Pratima Bhoumik, hasteni montri Ratan Lal Nath, montri Ram Prasad Paul, montri Sushanta Chowdhury aro Agartala Municipal Councilni Mayor Dipak Majumder.
Hasteni montriokra Jishnu Devvarma, Lok Sabhani MP Rebati Tripura, hasteni montri Rampada Jamatia, montri Santana Chakma, BJP Tripura hasteni twiphang yakchu Patal Kanya Jamatia, Janajati Morchani haste twiphang Bikash Debbarma song iswk BJP bodolgo Tiprasarokni ojama hinoi sinijagwibo bok twmwi i kokchaplaima panago khorokchaphabo phaiywi sopailiya, ibono lagwi barikhlai uanalaijak lukurok aro swngmwng kasajak.
BJP khlainai Tiprasa ojamarok kobokmwng manyani ebakhlai ringjakyani bagoide sogoiliya, ringjagwibo samwng-homwng pailaiyanide sogwiliya ibo tabokbo sraicha ongyakho. Aiphabo BJP bodolni miyani i kokchaplaima panago BJP khlainai Tiprasa ojamarok khoroksabo phaiywi sopailiya ongmani ibo barikhlai uanamasangcha aro BJP khlainai Tiprasa ojamarokni bagoi uansokjaknai kok.
No comments