Chawmanu, 25 September 2022: Tripura dophani amani kok Tripura kokni hamkraini bagoi thangnai 2020 bisigo khajakkha 'Tripura Writers...
Chawmanu, 25 September 2022: Tripura dophani amani kok Tripura kokni hamkraini bagoi thangnai 2020 bisigo khajakkha 'Tripura Writers' Forum'. Hasteni kothe kothe amchaini khorokbachisa adongno lagwi khajakkha Central Executive Committee aro khorokdok adongno lagwi khajakkha Advisory Committee.
Tripura Writers' Forum khajakmani olo Tripura kok aro kokrabaini hamkraini bagoi yak thakyakhlai samwng tangoi tongwk. Kokrabai blai, koktma blai, kokrabai bijaprok karejagoi tongwk.
Tripura kok aro kokrabaino arobo kuchugo tisani bagoi yak bai yak miliywi samwng tangni nangwk. Aini bagoi haste gnangoi Tripura Writers' Forumni committee khanani hinoi kokchapjakkha Tripura Writers' Forum, Central Committeeni thangnai kokmalama panago.
Kokchapjakmanitwi tini Dolai Hangkorni Longtrai Valleyni Chawmanugo Tripura Writers' Forumni kaisa kuthunglaimwng kokchaplaima pana songchajakkha.
Chawmanu amchaiyo Tripura kok aro kokrabaini hamkraino phuarnani bagoi khorokchisa adongno lagwi kaisa hamkrai committeebo khajakkha. I committeeni bisingtwi amchaini chrai-khnairokno Tripura kok aro kokrabaino phrwngnani aro kokrabaini samwngno charogoi tisanani bagoi samwng phrwngjaknai.
I hamkrai committee daiyo tongo- Janaka Tripura, Mantrijoy Tripura, Narayan Tripura, Kamla Charan Tripura, Kharendra Tripura, Thani Joy Tripura, Ranjan Kumar Tripura, Bita Mohan Tripura, Gana Chandra Tripura, Dharmendra Tripura aro Sonajoy Tripura.
I kokchaplaima panago Tripura Writers' Forum, Central Committeeni tangphang yakchu Janaka Tripura, rangphang-yakchu Kamla Charan Tripura, hodani samwng khlainai Mantrijoy Tripura, Umakanta Tripura, Champajoy Tripura, Barnajoy Tripura, Manjoy Tripura aro Chawmanu amchaini khorok bachini slaibo kabang Tripura kokbai suinai-khainai, kokrabaino hamjaknairok phaiywi majakkha.
I kokchaplaima panani achokphang ongoi achokkha machang Mananta Tripura.
No comments