Agartalago Songchajakkha Tripura Swrwngnai Buthu, Central Committeeni Salchani Kokchaplaima Pana

Agartala, 25 September 2022: tini Tripura dophani srwngnairokni motha 'Tripura Swrwngnai Buthu, Central Committee'ni sal...

Agartala, 25 September 2022: tini Tripura dophani srwngnairokni motha 'Tripura Swrwngnai Buthu, Central Committee'ni salchani kokchaplaima pana songchajakkha Agartala Krishnanagarni Tripura dophani Naran machang Birendra Tripurani tongthainogo. 

I panani achokphang ongoi achokkha Tripura Swrwngnai Buthu, Advisory Committeeni achokphang machang Dhananjoy Tripura. 

Phainai salgo buthuni samwng-homwngno gamkhlai charogoi tisanani, Tripura dophani hoda-hukumuno rwngwi larwknani, Collegeo katal Tripura srwngnairokno lamjonani bagoi Fresher's Meet pana songchanani, srwngnairokni kabangma jwngjalrokno lagwi khorang tisanani, ibohai kabangma kokbomarokno lagwi salaijakkha tinini i kokchaplaima pana daiyo.

I panago phaiywi majakkha Tripura Swrwngnai Buthu Advisory Committeeni adong Pranajit Tripura, Central Committeeni twiphang-yakchu Sunil Tripura, tangphang Samir Tripura, rangphang Tapan Kumar Tripura, Hriten Tripura, Biswajit Tripurano lagwi Central  Executive Committeeni kabangma adongrok.