BBM Collegeo Admissionno Lagwi ABVP bai Bujakkha TSF Bodol Agartala, 15 September 2022: onlineni bisingtwi je je katal srwngnairok tabokbo ...

BBM Collegeo Admissionno Lagwi ABVP bai Bujakkha TSF Bodol

Agartala, 15 September 2022: onlineni bisingtwi je je katal srwngnairok tabokbo Collegego admission ongmayakho bok miya 14 Septemeber salmarini siming collegego sakphang thangoi admission lanani chengkha hasteni General Degree Collegedaiyo. Hasteni chorok general degree college daiyo admission lajakmanino koso Agartalani Bir Bikram Memorial College daiyobo admission lanani chengjakkha. Tini admission lajakmani noi sal klaiywk. 

Iro satai klaiywk BBM College daiyo tabok ‘Students Union Council’ khajak krwi. Tmani hinba hasteni collegerogo chongbari songchajiyani bagoi council khajak krwi. Aini bagoi Collegeni Tiprasa srwngnairokni chorok samwng-homwngrok TSF-ni yaktwino khlaijago. ABVP bodolbo khlaiywk. BBM College daiyo TSF Agartala Town Committeeni Sport Secretary Birgoram Tripurani naikolmwng bai samwng-homwng ongwk. Bini logego tongwk TSF-ni adong Paresh Tripura, Anita Debbarma, Arjun Debbarma song.

Ibotwikhlaiywi Collgeni admissionni joragobo Twipra Students’ Federation (TSF) bodol hasteni langcha-langcha amchaini katal srwngnairokno admission lathanigo chubani bagoi helf desk achokkha. Admissionni poila sal ebakhlai 14 September salmarigo TSF, ABVP bodol kachang-kachang khlai katal admission lani phainairokno gamkhlai chubalaikha. 

Poila salgo chubalaimani koso tinibo chubalaini phailaika TSF bodol. ABVP bodolbo sopaijak. Mator tini chubani thangtanaigo jwngjal achaiywi kokbanglaikha TSF bodol bai ABVP bodolni bisingo. Twmwi hinba College goh (gate) bisingo uanjwi dophani srwngnairokno uaisabai kabang-kabang khlai daphabo Tiprasa srwngnairokno khlai iswk dajakya. Sani thangklai TSF bodol Tiprasa srwngnairokno chubamani ibo ABVP bodolni daiyo gam moko bai nujakliya, risi ongoi bachagwk. Ibono lagwi TSF bai ABVP-ni adongrok Council nogo salaini thanglaika. Aiphu Collegeni goh sojak. Iro TSF bodolni ongoi Birgoram Tripura aro Paresh Tripura thango. ABVP srwngnai bodolni adongrokbo tongwk.

Kainoi bodolni bisingyo kok salai tongthanigo kisamisa kok tansolaiywi salaithanigo ABVP bodolni aro kothe srwngnairok council bisingo habgwi bu-tok khlaika TSF bodolni khoroknoi adongno. Ibobai TSF-ni adong Paresh Tripura sago dukho makha, yago kwsa chagwi thwi-ho klaikha aro Brigoram Tripurabo bujakkha hinoi sakokha TSF Agartala Town Committeeni twiphang Maheshwar Tripura.

Tabok BBM collegego krak naimwthangni bisingtwi admission lajagwi tongwk, katal khlaiywi aro mwngsa ualai-soklai onglaimani rwi hinoi koktma.