Tipra Mothani Ojama bai BJP-ni Ojamarok Malaimano Lagwi Uanalaijak Lukurok Agartala, 3 June 2022: miya diphwk atlogo Tipra Mothani ojama eba...
Tipra Mothani Ojama bai BJP-ni Ojamarok Malaimano Lagwi Uanalaijak Lukurok
Agartala, 3 June 2022: miya diphwk atlogo Tipra Mothani ojama ebakhlai bobagra Pradyot Kishore Manikya bai BJP bodolni ojamarokni bisingyo thaincha khlai kaisa pilik social mediago barikhlai lwkmani (viral) nujakkha. I pilikno lagwi lukurok jani je muchutwi salaikha. Lukurokni khago kabangma swngmwng achaikha.
Baksaba salaika, Tipra Motha saka sakago ‘Greater Tipraland’ naiywk, ‘thaincha’ naiywk. Mator bisingyokhlai BJP bodolni ojamarok bai paijagoi paikha.
Aro baksaba salaika, bo khorokcha hani bobagra ongoi jesa borok bai malaimano, tma BJP, tma CPI(M), tma Congress, jesabaiphabo malaimano. Ibobai Tipra Motha kaisa bodolni daiyo phajaknani kokya.
Baksaba salaika, je borok bobagrano BJP-ni ojamarok bai malaimani pilikno nugwi nang-nangya kok silchago o borok dopha hamkrai naiya, Tiprasani hamkrai naiya.
O pilikno nugwi lukurok bodol thogwi kaisa bai aro kaisa koksilchagwi kokbanglaimani nujakkha social mediago. Tmani hinba lukurok koboi kokno sagwi mayani bagoi ibotwikhlai kok banglaikha aro kok kasaka. Aini bagoi ibo bari uanajaknaibo kok.
Mator, bobagra bai BJP bodolni ojamarokni bisingyo malaimanino lagwi lukurok jeswk uansoka iswkbo kwbwiya. Hor jorago bobagra social mediago lwkjak pilikno bini facebook daiyo post khlaiywi kwbwi kokno saka. Bo jetwikhlai post khlaiywi saka ibo ongkha, “Bumped into the BJP leaders today at the VIP room as I landed from Guwahati today while waiting for my luggage at the airport ! They said hello and I politely replied. But those who took this picture and spreading this have to be really cheap people. I sometimes meet in a public place Jitendra babu of Cpim, I meet congress and TMC leaders but it’s always whenever that I bump into BJP leaders this sort of nonsense is spread”.
Ibo simingya, bobagra 22:10 jorago Hindi bai 1:42 durationni kaisa voice recordingni bisingtwi lukurokno sraicha khlaiywi saklaikha, “Agartalani MBB Airport daiyo sopaimani olo bini poja-berano naisingphugo VIP room daiyo BJP-ni ojamarok bai malairogo. Bok khulungka hinoi sakai angbo khulungka hinoi saka. Khorokcha BJP-ni ojama swngkha, I airportno nwphade snamlangka na nuchu snamlangkha? Ang saka, achuse snamlango. Olo poja-bera sopaikha, angbo akhogwi phaika bokbo akhogwi thangka. Mator, je borok I pilikno tisaka ibo BJP-ni bisingni borokse! Twmwi hinba BJP-ni kaisa IT Cell tongwk, jonom aida koktma auaiywi lukurokno oroi-poroi khlaina, kaisa bai kaisano ualairona ibo bokni kaisa tongmwng. Ang TMCni kabangma borok bai malaiywk, jorago airport jorago chaphu-lwngphugo. Ang congressni kabangma ojamarok bai malaiywk, jephu chini pana songchajago, idaiyono malaiywk. Jitendra babu, jeno ang barikhlai borom rogo, ang bini nogobo thangwk, bobai ang chabo lwnglaiywk. Iborok twmwi phataro akhoya? Mator, jephugo achamitini airportrogo, jesa jegago, CM bai baksa birkhongo achokjak, ibotwirok twmwi phataro kariywi auaijak? Jonom BJP-ni malaimani khlai twmwi auaijak? Twmwi hinba BJP bok sak sakno ibotwikhlai auaiywk lukurokno oroi-poroi khlairona bagoi. Ang nohkno sraicha khlai sagwk, I chongbariyo Tipra Motha BJP-no gamkhlai kokphirokmwng ronai! Belaino hambai”.
No comments