Kisamisa Patimwngbai Tongkachangkhlai Paikha Chongbari, Chong Klaikha 78.58% , Khna Chong Thikijaknai Kokmalama, 25 June 2022, Agartala: th...
Kisamisa Patimwngbai Tongkachangkhlai Paikha Chongbari, Chong Klaikha 78.58%, Khna Chong Thikijaknai
Kokmalama, 25 June 2022, Agartala: thangnai 23 June salo hasteni kaibrwi bwkcha achokthai daiyo Assemblyni chongbari paikha. Chong klaikha jomangoi 78.58%. Khna 26 June chong thikijaknai.
O salni phurungni jiming tongthok-chathokni bisingtwi kaibrwi achokthai daiyo chong rolainani chengkha. Kabangma amchaiyo kisamisa ualai-buklai onglaimani nujakkha. Mator, iboni bisingyobo gamkrwng khlaiywi chongmari paibaikha.
O salni chongbariyo 1,86,756 voterni bisingyo 1,46,760 voter sakni chongno rophaika. Ibo 78.58% chong klaikha chong ronairokni bisingyo.
Lukurok kothe-kothe bodolni ongoi batainai khorok noichinoino chong rokha, iboni bisingyo bana khorokbrwini makhango tal kasanai. I chongbariyo batainairokni bisingyo tongwk BJP, CPI(M), INC, TMC, Independent.
I chongbariyo jotoni slai khurchajaknai kok ongkha 46.Surma (SC) chongbari achokthai daiyo hasteni regional party ongoi SC achokthaiyo poila bataikha Tipra Motha. Batainai ongkha 10323ni sebok kmajak phrwngnai Baburam Satnami.
I chongbariyo jotoni slai kabang chong klaikha 57.Jubarajnagar achokthai daiyo, 83.12% aro jotoni slai kisa chong klaikha 8.Town Bordowali achokthai daiyo, 71.13%.
Election Commission of India bai saklaijak i kaibrwi chongbari achokthaiyo boro bwswk chong klaikha, ibo ongkha- 6.Agartala achokthai daiyo voter tongwk 51,197, iboni bisingyo chong rokha 39,607 voter, ibo 77.35% klaiywk.
8.Town Bordowali achokthai daiyo voter tongwk 46,011, iboni bisingyo chong rokha 32,726 voter, ibo 71.13% klaiywk.
46.Surma (SC) achokthai daiyo voter tongwk 46,757, iboni bisingyo chong rokha 38,862 voter, ibo 83.11% klaiywk.
57.Jubarajnagar achokthai daiyo voter tongwk 42,791, iboni bisingyo chong rokha 35,569 voter, ibo 83.12% klaiywk.
O salni phurungni jimingno chong rolaiphabo kebengnai bodolrok chongrothaniyo kebengjakmani kok silchakha. Kabangma booth daiyo haphango achokjak bodolni samwngsitra tangnairok bai chong rothaniyo kebengjakmani, butok khlaijakmani, sikri-sokro, hanang-pemang khlaijakkha hinoi kok silchajakkha.
6.Agartala achokthai daiyo chong rona thangoi Samir Saha bwmwngoi TSR khlainai khorokcha nukhungni borok bai chong roni thangtaniyo samwngsitra tangnairok bai degar bai sujakkha. Bo tabok Agartalani GBP Hospitalgo klaijak.
6.Agartalani 55 boothni voter Nanu Chowdhury chongroni thangtaniyo samwngsitra tangnai-rok bai choprojago. Bono toimago khibiyoi rojakha hinoi kok sailcha-jakkha. NDRF bodol rutugoi tongphwk hinoi koktma.
8.Town Bordowali achokthaini Tulsibati rwngnogo chongroni phaitaniyo Central Roadni Sukhendu Saha bwmwngoi khorokcha voter boma burichwk aro hikno loge twbwi chong roni phaitaniyo naimwthangni baskangono malkhong bukhrujakkha
46.Surma achokthaiyo samwng-sitra tangnairok phaike-phaike ongmani bai naimwthangrok bai bujagoi khorokdokni sago dukho manoi Kulai District Hospitalgo klaijak hinoi koktma sagoi makha.
Salil Debbarma (90) bwmwngoi khorokcha chakra Ambedkar Boys Hostelgo sakni chong roni thangtaniyo khorokchi chinoi samwng-sitra tangnairok bai lama kasojagoi hanang-pinang khlaijakkha. Khaklabo songkojakkha, basakni kubai sichijakni naijakkha. Haiphabo bo sakni chongno rogwi thangka.
Kabangma jegago chhapa vote roni phaiywi lukurok bai, koktma-thungnai bai, naimwthangrok bai rwngjakkha, saprakjakkha. Ibotwi patimwng 8.Town Bordowali achokthai daiyono kisa bangkha hinoi koktmago sagwi majakkha.
No comments