Tripurarok Amanikokno Hangphangni Daiyo Gosemwng Bithani Tma Chaiya? Agartala, Kokmalama, 29 May 2022: Jesa dophani amani kok, kokrabai, lai...
Tripurarok Amanikokno Hangphangni
Daiyo Gosemwng Bithani Tma Chaiya?
Agartala, Kokmalama, 29 May 2022:
Jesa dophani amani kok, kokrabai, laibuma, lukuraida, hodaraidarokno derokrogwi larwkni samwng ongkha o dophani lukurokni.
Laibuma rwgwi sinijak Tripura dophani amanikok Tripurakok haiyongni kaisa kacham kok. I kokbai kok sanairok haiyong gnangoi pirjak.
Tripurakok kaisa kacham kok ongphabo jeswk hamkrai ongni nangmani iswk ongjiya, kabangma
jwngjal aro kebengmwngni bagoi. Aini bagoi Tripurakokni hamkraini bagoi Tripurakok bai suimani-khaimani, kokrabaimani badebo haphangni daiyo gosemwng mani
bagoibo khorang tisajakkha Tripura dophani kabangma motharokni phaichingtwi. Ibo katal kokya, miya uksani kokya, ibo bisi kolokma rwngwi khorang tisajagwi phaijak.
Thangnai 24 May salo Tripura
hasteni katal Tribal Welfare montri machang Rampada Jamatia bai
Tripura dophani ojamarok malaiywi Tripura dophani kisamisa jwngjal aro mathai-soktairokno lagwi kokmalama salaiywi pilik tisajakmanino lagwi tabok thaincha naiyairok aro sijak-nujakrok social mediago nang-nangya lwkrogwi boromgnang montri Rampada Jamatia bai Tripura dophani
lukurokno barikhlaiywi lachimasangcha khlaimani nujagoi tongwk.
Tabok kok ongkha, jesa dopha bokni amani kokni hamkraini bagoi kokrabaini samwng-homwng khlai-
mani aro haphangni daiyo gosemwng biywi choba khlaitaniyo tma bokni chaiya tongba? Bok sorono
hamya khlaiba? Bok soroni maikhlaino swtrwngwi chaba? Ibo tabok lukurokni daiyo swngmwng gara ongoi achaijak.
I ha sakago tongoi sakni amani
kokno rwngwi larwkthaniyo kaisa arokaisano phariklai chubalaiywk, mator kasonani keboni phran krwi!
Tripura dophani lukurok sakni amani kokni bagoi samwng khlaitaniyo keboni hamya ongnani kokya. I koknobo khurchatai klaiywk, kaisa dopha bini hoda hamkraini bagoi samwng khlaini bagoi keboni daiyo permission lanibo nangya, keboni daiyo nakarmwng binibo nangya.
Aini bagoi aino tongmang-chamang kok krwini kok, kwsa
krwini kwsa snamgwi Tripurarokno social media daiyo naislima phunumani ibo barikhlai chaiya klaiywk.
Twmwi hinba janino ja twiywi tongmakhai i haiyongo bari gam.
No comments