File Photo : N.C Debbarma & Mever Kr. Jamatia Agartala | 20 May 2022 : Kokborokni Roman Scriptni bagoi kebengnai aro kasonai ongkha mon...
File Photo : N.C Debbarma & Mever Kr. Jamatia
Agartala | 20 May 2022: Kokborokni Roman Scriptni bagoi kebengnai aro kasonai ongkha montri Narendra Chandra Debbarma hinoi saka kacham montri Mevar Kumar Jamatia. Kisa koktma sukrugwi nailainwk. IPFT bodol tabok baknoikhlai bakjakha- NC Debbarma bodol aro Mevar Kumar Jamatiani bodol.
Thangnai 2-3 April 2022, salnoi rwngwi Agartalani Dasarath Bhavan daiyo IPFT bodolni 5th Annual State Cenference songchajakmago chorok ni gosemwng bai montri Mevar Kumar Jamatiano bodolni katal twiphang aro YIPFT-ni twiphang Dhananjoy Tripurano bodolni katal tangphang chongjakkha. Iboni olo achokthai aro gara seklaiywi NC bodol bai Mevarni bodol jani je pharitwi phran phunugoi kothe kothe khlaiywi conference songchalaikha.
Thangnai 12 May salo NC bodol Agartalani Nazarul Kalakshetra daiyo salchani extended conference khlaika. 2-3 April salo khajakmani Committeeno sabaiywi rokha. NC Debbarma aro uaisa IPFT bodolni twiphangni achokthai lakha. O salni sare joragono IPFT-ni twiphang montri Mevar Kumar Jamatiabo koktmathungnai pana ringywi saka, bokni 12 May salo khlaimani conference ibo raida chaiya. Bokni sakago bodolni kerong raida rwgwi krak yapri sejaknai.
Iboni olo IPFT Mevar bodolbo 16 May salo Rabindra Bhavan daiyo salchani conference khlaika. Conferenceni jorago bo koktma thungnairok bai swngjagoi khani kokno khuk khuk koplegwi saka, ‘Kokborokni bagoi Roman Script no kasonai ongkha montri NC Debbarmase’. Bo arobo saka, ‘bo Tiprasa hamkrai montri tongphugo hasteni chorok montrirokno Roman Scriptni phaichingyo goserogoi paijakse mator montri NC Debbarma simingse Roman Script ni phaiching goseyagwi arouaisa committee khanani kok saphwk’.
Ibo simingya Mevar arobo saka, TTAADC-ni mathai-soktaino lagwi hagara haphangni daiyo draft khlaiywi hopugobo TTAADC-ni bwmwngno ‘Tipraland Territorial Council’ hinoi suipugo montri NC Debbarmase Tipraland kokthaino knorogoi bana ‘Tipra Territorial Council’ hinoi hoka-phwk’. Kokborokni Script lagwi khutrugo huijak uanamasangcha kokno kacham montri Mevar Kumar Jamatiani khugo peplaimani video social mediani bisingtwi lwkmani olo tabok haste gnangoi kok kasajak, hamkraini bwmwngwi Tiprasano kasonai ongkha Tiprasa ojamarokse!
No comments