BBM Collegeo Raida Chaiyatwi Principalni Signature Lagwi Identity Card Snamjakrokno Phirogoi Rothangnani Saklaijakkha

29 December 2023, Agartala:  Agartalani Bir Bikram Memorial College (BBMC) daiyo Student Identity Card raida chaiya khlai Principalni Signat...

29 December 2023, Agartala: Agartalani Bir Bikram Memorial College (BBMC) daiyo Student Identity Card raida chaiya khlai Principalni Signature lagwi samwngo thepamani koktma kasagwi phaika. Aini bagoi khajak jorani bisingo raida chaiyakhlai Principalni signature lajak Identity Card rokno Collegeo rothangnani bagoi saklaijakkha Collegeni Principalni phaichingtwi.

Thangnai 27 December 2023, Agartalani Bir Bikram Memorial Collegeni Principal In-Charge Dr. Ratan Deb i patimwngno lagwi kaisa saklaimwng balaini bisingwi saklaiywi rokha, BBM Collegeni 3rd aro 5th Semestergo srwngoi tongnairok College naikolphangni gosemwng krwibade raida chaiyakhlai Identity Card daiyo Principalni signature lagwi tongmanirokno phainai saltam jorani bisingo o Identity Cardno arouaisa Collegego yapharnani bagoi. 

Collegeni naikolphangni gosemwng krwibade Principalni signature lagwi Identity Card samwngo thepanairokno kerong raidani bisingtwi krak yapri sejaknai hinoibo saklaijakkha.

I patimwmgno lagwi tabok hasteni lukurokni daiyo kabangma swngmwng achaijak, BBM Collegeno kosol hasteni bwmwng gnang kaisa collegego braikhlai Collegeni naikolphangni gosemwng krwibade Principalni signature lagwi srwngnairok Identity Card snamrakkha? Ibotwikhlai raida chaiyatwi Principalni signature lagwi Identity Card snamnairokni ulugo tma huijak naimwngrok tongoi tongkhna?