8 Sept. 2023, Kumarghat : hastego Tiprasarok hanag-pinang khlaijagoi tongkesep khlai matongmani arouaisa moko baskango dak-dak khlai nujakkh...
Tiprajwkrok romphre-sokphre, bu-tok khlaijagoi, malkhong bai phregwi buthajakmani badebo sadang-madang kuthunglaiywi bulaimani koktma kasai phaika Tripura hastego.
Ibotwijati selengmasangcha patimwng patikha North Tripura hangkorni Kumarghat hatigo.
Koktmagoi sagwi majakkha, thangnai 6 Sept. salmarini sareni dambrwi jora atlogo Longtrai Valleyni North Dumacherra amchaini takhuk Mina Ranjan Tripurani sajuk Megha Tripura bwmwngoi khorokcha Tiprajuk bo bini khorokcha chla aphakbai scooty kagwi Kumarghat atlogo thangmani bini mobile snamroni bagoi. Bo Kumarghat amchaiyo nokchorai tongphwk hinoi koktma.
Scooty bai thangtanigo kaisa kachak ban (colour)ni magic malkhong overtake khlaithanigo bokni scooty bai nangtoi ongoi thangka, mator nangliya. Ibobai scootyno lama kasogoi Megha Tripura songno kok hamya hamya sakaphwk. Magic malkhongo aro khorokcha passanger tongphwk, bo malkhongo achok achogoi Megha songno mobile bai record khlaiphwk. Ibono nugoi Megha Tripura o uanjwi passangerno swngka, nwng tmani ano video khaika, sroni daiyo permission lakha hinoi ?
Ibobai o Kumarghat hatini uanjwirok Coperative bank sakango kuthunglaiywi Megha Tripura aro bini aphaksano latha, current bulb bai je mantwi bulaikha. Ibobai Megha Tripura aro bini aphaksa barikhlai sago dukho makha. Ibo haiklai khorokcha brwino lukuni baskango barikhlai lachimasangcha khlaika. Bo bujakmani video tabok social mediago barikhlai lukjak (viral).
Megha Tripura song bujakphugo Police bokni korego tongoibo bana thlwng thlwng bwchagoi siming naiywi tongwk, bunairokno mwthakya, khakbo khakya!
Policeni baskango khorokcha brwino ibotwikhlai chalarok kuthunglaiywi bujakmani policeni samwng-homwngno lagwibo swngmwng kasagwi phaika, police soronikhlai khaja uansok, soronokhlai phikong uansok?
Ibotwikhlai Tiprajuk brwini sakago bu-tok khlaijakmani patimwng ongmani Bharat hagara hapangni ‘Beti Bachao Beti Padhao’ni khorang mwngsa samwngo chokliya chini i rangchak Tripura hago!
Tabok hastego Tiprajuk brwirokni sakago hanang-pinang, sikri-sokoro khlaijakmani slai sal bangsai phaika. Ibo Manipurni
patimwngno arouaisa mwito khlai rokha. Khorokcha brwino ibotwikhlai sadang-madang lahar kacharo kuthunglaiywi je bulaikha ibo social mediago viral ongjak videoni bisingtwi chwng nugoi makha.
I patimwngno lagwi krak justice naiywi aro bono bunairokno krak majra ronani biywi tini 8 Sept. salmarigo bujaknai Megha Tripura bo Kumarghat Police Station daiyo kaisa FIR khlaika.
Bo FIR balai daiyo suika-
“I miss Megha Tripura, D/O Mina Ranjan Tripura inhabitant of North Dumacherra VC would like to lodge a complaint againts the attacker on me on 06/09/2023 at around 4:00 PM by a group of some local inhabitants of Kumarghat Bazaar on said day. As I was travelling to Kumarghat Bazaar by my scooty, while travelling one passenger vehicle overtake me and we had an argument with the driver about the matter. But suddenly a group of men gather at Kumarghat Bazaar near Co-operative Bank surrounding me and started beating and molested me in the public place with intention to outrage self respect and dignity.
Those assaulting me were belonging Bengali Community and they were abusing me by saying that I am being to ST Community, I am characterless and do prostitution and when I told them that I would file a complaint about it they intimidated me by saying that “Tribal Meye Tumi Complaint Korle Tore Rape Koira Maira Laimu, Tui Tribal Meye Kita Korte Parbe”.
Patimwngno lagwi Megha Tripurani FIR copy daiyo khurchajak kokrokno cheywi naikhlai aro viral ongjak bujakmani videono naiywi naikhlai bari kha khamjaknai kok, khorokcha Tiprajuk sakni hago tongoi bobo haiklai bwini dophani borok bai satokjagoi tong.
Tini bujaknai Megha Tripurano loge tlangoi Kumarghat Police Station daiyo FIR khlaiphugo MLA Nandita Debbarma Reang, MLA Swapna Debbarma song thangoi majakkha.
Megha Tripurani sakago ibotwikhlai bu-tok khlaimani patimwngno lagwi haste hapang aro Tipura Police krak yapri segwi bunairokno krak majra roni ongthwk hinoi haste gnangoi lukurokni khorang tisamwng. Tabok naiywi naithai haste hapang aro Policerok tma yapri seno.
No comments