Interlocutor Soro Chongkha? Sorono Chongkha, Swngmwng Tisaka IPFTni Budha Debbarma

24 September 2023, Agartala:  thangnai Tripura Assembly IPFT bana kaisa achokthai simingo kaplai ongkha, bono montribo ongkha. Bo ongkha Suk...

24 September 2023, Agartala: thangnai Tripura Assembly IPFT bana kaisa achokthai simingo kaplai ongkha, bono montribo ongkha. Bo ongkha Sukla Charan Noatia. 

Iboni olo tabok IPFT bodol arouaisa sakni kmajak achokthaino phirogwi twbwiywi

bodolno krak khlaini bagoi chaitokmani nujakkha. Aini bagoi miya 23 September salmarigo Agartalani Dasarath Bhavango garakhlai songchajak IPFT bodolni salchani kokmalaima pana. I daiyo IPFT bodolni chorok ojamarok phaiywi sopaijak.

Pana paimani olo IPFTni sikla bodolni ojama Budha Debbarma bo ‘Greater Tipraland’ bai ‘Tipraland’ni bisingo pherlaimano lagwi koktmathungnairok bai swngjagoi saka, chwng bwini bimwngno lagwi bokhorok mitingya, chwng chini bimwng ‘Tipraland’. Tiprasa lukurokni hamkraini bagoi TTAADC amchaino braikhlai kaisa haste snammano, ibono lagwi chwng saplwng-hoplwng, bisi-bisi rwngwi samwng tanglai tonglaiywk.

Greater Tipraland tma, iboni kokmang Greater Tipraland binairok gamkhlai sagwi manai. Aiphabo ang iro sagwimano, uaisakai saka Bangladeshni Chattagramno lagwi Greater Tipraland ongnai, uaisakai saka Mizoramni jero

jero Tiprasarok tongnai amchaino lagwi Greater Tipraland ongnai. Assam, Myanmar, Mizoram, Bangladesh kabangma amchaino lagwino Greater Tipraland ongnai hinoi bokni ojamarok sukrugwi samani swkangni salgo. Ibo ongde ongno ongya lukurokse sichinai. Bangladeshni Tiprasa amchaino lagwi tabokbode bimwng bilai tongkho ibo bokse sagwi manai. Bokno sraicha khlaithwk. Mator chwng biywk, TTAADC amchaino lagwino Tipraland kothe haste. Ibo Bharat hapangni daiyo chini bimwng. Chwng kebono kebengoi bimwng biya, chini Tiprasani hamnani, chanani aro thinangni bagoise bimwng biywk hinoi saka Budha Debbarma. 

Interlocutorno lagwi bo arobo saka, interlocutor kwbwide chongjakhna? Interlocutor soro chongkha? Sorono chongkha, taboksakjora chwng notificationbo nuyakho, sagwibo mayakho! Sakango interlocutor ongkha hinoibo auaijakmani nukha, mator taboksak jora

officially interlocutor nuyakho! Tomwng ongoi tongwk hinklaiba, tmani bagoi chongjakkha ibonose sakang sraicha khlai sagwi mani nangsogo. Sagwi mayabade bono gode gose goseya sanani sep krwi hinoi saka IPFT sikla bodolni ojama Budha Debbarma.