8 August 2023, Agartala : Tripura kokbai hatibrum rwgwi karejaknai koktma balai HANI KOKMALAMA ni yapri himna chengkha tinini siming. Agarta...
Agartala Krishnanagarni Naran machang Birendra Tripurani tongthainogo songchajak katal koktma balai karema panago Tripura dophani okra NARAN machang Birendra Tripura, Tripura Brwi Buthu, Central Committeeni twiphang machangjuk Rani Tripura, Tripura Writers' Forum, Central Committeeni twiphang machang Dharinjoy Tripura songni manjakmani bagoi karegoi rojakkha HANI KOKMALAMA Tripura koktma balai.
Panani achokphang ongoi achokkha HANI KOKMALAMA koktma balaini kokmithingnai, karenai aro nokphang machangjuk Bijali Debbarma (Tripura).
Panani poilago naruairokno Risa rogoi lamjomani olo koklopnaijuk Bipasha Tripura bo Tripura koklop thaisa loboi khnaromani bisingtwi panano chengoi rokha.
Iboni olo phaiywi majakjak naruairokni yaktwikhlai karegoi rojakkha hatibrum rwgwi Tripura kokbai koktma balai HANI KOKMALAMA ni poila bwkrangno.
Iboni olo Tripura Brwi Buthu, Central Committeeni twiphang machangjuk Rani Tripura i koktma balai karemani lagwi kok sagwi khanarokha.
Iboni olo suikrwng aro koklopnaisa Khumpui Ray Tripura bo Tripura koklop thaisa loboi khnarokha.
Dopha hamkraini bagoi, kokrabaini hamkraini bagoi press, mediani nangmwng aro bini samwng-homwngrokno lagwi kok sagwi khnarokha suikrwng Sarup Tripura.
I HANI KOKMALAMA koktma balai karejakmani laibomani kokno rwgwi kok sagwi khanarokha Tripura Writers' Forum, Central Committeeni twiphang machang Dharinjoy Tripura.
Panani paithak atlogo i koktma balai karemani rwgwi nangsokmani kok sagwi khanarokha Tripura dophani okra NARAN machang Birendra Tripura. Bo saka, kaisa dopha sinijakthani, mwthangjakthani koktma balaini samwng homwng barino gara. Tabokni jorago ha dophani jwngjalni khorang ongkha koktma balai. I koktma balai karejakmani bisingtwi chorok Tiprasani beser-basar, kmajak-kchaujak, swkmwkjak, auairwkya koktmarok chorok lukurokni daiyo twbwijaknwk, auaijaknwk.
Bo arobo saka, i koktma balai Tripura kokbai karejakphabo arokothe Tiprasarokni jwngjalni koknobo suinani, auainani, khorang tisanani nangnwk. Bo arobo saka, hasteni Tiprasarokni amani kok Tripura kokse ongni nangwk. Ibo 1901, 1930 Swadin Tripura Census report daiyobo sraicha khlai khurchajak tongwk. Bini badebo British Political Agent ongoi Swadin Tripura hago phainairokni survey report daiyobo suilangjak nugwk.
Tinini panani achokphang ebakhlai HANI KOKMALAMA koktma balaini kokmithingnai, karenai aro nokphang machangjuk Bijali Debbarma (Tripura) panago phai majaknai chorok adongrokno khabai khukbai hamjakma yaphargwi panano mwthagoi rokha.
No comments