TSUni Tangphangno Social Mediago Kok Hamya Sagwi Choprokha YTFni Tangphang Dharanjoy

2 July 2023, Agartala : lukuchongraida (democracy) hago jesa borok jesa bodol khlainani, kok sanai right tongwk. Politicalni raidatwi khorok...

2 July 2023, Agartala: lukuchongraida (democracy) hago jesa borok jesa bodol khlainani, kok sanai right tongwk. Politicalni raidatwi khorokcha arokhorokchano kok phiroknanibo raida tongwk. Mator khorokcha borok jeno chajak, khorokcha borok je bodolno hamjak, khorokcha borok je bodolno lagwi emang nugo hinoi arokaisa borok o bodolno hamjaknani kokya! Bo o bodolno hamjakyaphano ongmago, chajakyaphano ongmago. Arai hinoi khorokcha political leader aro khorokcha political leaderno khuk hamya kokthai hamya bai social mediago phaiywi lachimasangcha khlainani kokya.

Koktmago sagoi majakkha, thangnai salnoi sakango Tribal Students' Union (TSU) Central Committeeni tangphang machang Sujit Tripura kaisa panago thangoi koklarwkphugo Greater Tipraland bimwngno lagwi kisa kok samani nujakkha. Bo o koksamani video clipno D Tripura bwmwngoi kaisa Facebook Accountni siming post khlaijak nugo. D Tripura bai post khlaijak video clipno share khlaika Dharanjoy Tripura. Bo share khlaimani caption daiyo ibohaiklai suika--

"Student no de ng rajniti sekai ro Mosok basa

Greater Tipraland TIPRA Motha khly nai rok ni bagwi semiya all triprasa ni bagwi c TJUS rok ADC sanai tei fy kha nrok CPIM khly nai rok c cha ble wansa bocholai mosok basa sujit Tripura".

Tabok kok ongkha Dharanjoy Tripura bo khorokcha Tipra Mothani sikla-chakli bodol Youth Tipra Federation (YTF)ni Central General Secretary achokthai daiyo tongwk. Tipra Motha Tiprasani hamkraini bagoi khorang tisagoi tongwk, Greater Tipraland biywi khorang tisagoi tongwk. Dharanjoy Tripura tabok dophani hamkraini bagoi samwng tangnai bodolni gam achokthai daiyo tongoi tongnai tangphang hinoi sinijagoi tongtotwi braikhlai aro kaisa bodolni General Secretaryno khuk hamya bai kutukmakha? TSUni Central Committeeni General Secretary ebakhlai tangphangno Mosok basa, wansa bocholoi hinoi khuk hamya bai hin makha? Bini ibotwi hamya kokthai thepa thepagoi TSU Central Committeeni tangphangno social mediago kutukthanigo YTF ebakhlai Tipra Mothani kwbwi phrwngmwng de ongkhna? Tomwmg bodolni mwngsa thogwi rojakmwng krwi hinklai salnoi jora laiywibo YTF bodol tmwi Dharanjoy Tripurano lagwi kok thaichabo samaya ong? Tabok lukurok uanalaijak aro swngmwng tisalaijak dopha hamkraini samwngo krwngjakrokni ibotwijati post, commentno nugoi.

Je borok dopha hamkraini kok jonom sago o borokni khugo mosok basa, wansa bocholoi hinoi hamya kokthai sa sawi arokaisa bodolni ojamano social mediago lachimarogoi chopromani barino chaiya klaio, ibo khorokcha borokno defame khlaimanibo klaiywk hinoi salaikha sijak nujak lukurok. Tmwi hinba khorokcha leaderni khugo ibotwijati yaklaijak kokthairok barino machangya !

Tabok Dharanjoy Tripurani i post social media gnangoi viral ebakhlai lokjak. 

Tabok naiywi naithai TSU Central Committeeni tangphang Sujit Tripurano ibohaiklai social mediago kokhamya sagwi attack khlaimani aro defame khlaimanino lagwi tma yapri seno.