3 July 2023, Agartala: thangnai 23 June 2023 salmarigo IPFT bodolni Executive Committee aro bini bedek buprarokni kaisa kuthunglaimwng kokch...
3 July 2023, Agartala: thangnai 23 June 2023 salmarigo IPFT bodolni Executive Committee aro bini bedek buprarokni kaisa kuthunglaimwng kokchaplaima pana songchajagwk. I kokchaplaima panani achokphang ongoi achogo IPFT Central Committeeni twiphang Prem Kumar Reang.
Kokchaplaima panago kokchapjakkha phainai 23 August salmarigo IPFT bodol ‘Tipraland’ aro High Level Committeeni reportno lagwi Delhi Abhiyan khlainani. Thangnai 25 June salmarigo montri Sukla Charan Noatiani tongthainogo koktmathungnai pana ringoi I koktmano saklaikha IPFT bodolni khukphang Amit Debbarma.
Bo saka, 150-200 adongno lagwi Delhigo thangjaknai. Delhini Jantar Mantargo Tipraland bimwngno khorang tisagoi salchani bagoi kuthunglaijaknai.
Bo arobo saka, Roman Script bai Kokborokno gosemwng biywi khorang tisajagoi tongmani aro bini jwngjalno daktwi yak kakronani bagoi yapri senani ibobo kokchaplaima panago kokchaplaijakkha.
Kokborokni Scriptno lagwi 24 June salmarigo montri SUkla Charan Noatiani twidulmwng bai IPFTni bodolsa ojamarok hasteni montriokra Prop. (Dr.) Manik Saha bai malaiywi kokmalama salaika aro IPFT bodolni phaichingtwi kangsa memorandum blaibo ephajakkha. Kokborok jabwini siming hastego gosejak tongwk, aini bagoi Scriptni jwngjalno yak kakronani bagoi Roman Script bai Kokborokno suinani bagoi sep khlairodi hinoi montriokrano sagoi kabomani koknobo o koktamthungnai panano tisagoi sagwi khnarokha. Montriokrani kokno khnagoi barikhlai tongthokkha. Braikhlai Kokborokni Scriptni jwngjalno pairogoi mano I lamano naitrugoi karejaknai hinoi IPFT bodolno saka montriokra. Mator kebengnai bodolrok jwngjal paisokronani lamano naikhoyagwi lamago akhogwi choba khlaimanino lagwibo sagwi khnarokha IPFT bodolni khukphang Amit Debbarma.
No comments