21 July 2023, Agartala: I haiyongo jesa dophani sinimwng ongwk bini amani kok bai. Amani kokni bade kaisa dophani sinimwng aro hamkrai ongna...
Thangnai 13 July 2023 salmarini siming Kaubru aro Tripura kokni gosemwng binai Bru dopha bai Tripura dophani lukurokno lagwi Tripura hani bodolsa sijak-nujakrok, yak-themrang khuk-themrangrok barikhlai hamya hamya kok ko) social mediago post, comment khlaiywi makhracha kwsa mantwi onglai tongmani nujakkha. Kaubru bai Tripura kokni gosemwng binairokni bagoi Greater Tipraland maglak, thainchano swabaiphwk hinoibo aida aida kok sagwi koksilchanani chenglaikha. Nogo achok achogoi samwng krwini social mediago langpang post khlaiywi naislilaima phunugoi Reang ebakhlai Bru aro Tripura dophani lukurokni sakago hamya hamya salainani chengwk. Ibo bari chaiya!
Jani jani amani kokno gosemwng biywi khorang tisamani ibo Constitution of Indiani kerong raidagobo sraicha khlai khuchajak tongwk. Constitution of Indiani Article No. 29 (1) daiyo suijak tongwk ibohaiklai--
"Any section of the citizens residing in the territory of India or any part thereof having a distinct language, script or culture of its own shall have the right to conserve the same".
Aini bagoi Bru dopha bai Tripura dophani lukurok sakni amani kokno hapangni daiyo gosemwng biywi 1981-82 bisini siming khorang tisagoi phailaika. Tabokbo biywi tongkhwk.
Bru bai Tripura dophani lukurok bokni kokni hamkraini bagoi gosemwng bithanigo bokni mwngsa chaiya krwi. Tmwi hinba, chorok dophano naiywk jani jani amani kok aro kokrabai hamchathwk, chasathwk aro kuchugo kasathwk hinoi.
Bru bai Tripura dophani lukurok bokni kokni gosemwng biywi haste aro hagarani montrini daiyo bimwng tisagwi uaireuai kokton suimani, memorandum balai ephalaimani badebo Tripura Legislative Assemblyni Housegobo tisajakjakkha.
Thangnai 23 March 2022 bisigo Kaubru aro Tripura kokni hamkraini bagoi haste hapang kothekhlai Tripura Language Development Committee aro Kaubru Language Development Committee khanani bagoi swngmwng tisagwk IPFT bodolni MLA machang Dhananjoy Tripura. Tripura Legislative Assemblyni laibumago ibono poila Kaubru aro Tripura kokni hamkraini bagoi Haousego kok tisamwng. Iboni olo Kaubru kokni hamkraini bagoi hasteni rwngnokrogo Kaubruno phrwngnani bagoi thangnai 13 July 2023 salmarigo Assembly Sessionni jorago Housego arouaisa tisaka hapang BJP bodolni MLA machang Pramod Reang.
MLA Pramod Reang Kaubru kokno lagwi Assembly Housego Reference Notice tisamani nugoi hasteni bodolsa themrang, bwini kokni hamkrai naimaya ongnairok social mediani bisingtwi barikhlai hamya hamya sa sagwi theranmani nujakkha. Baksaba sago, Tripura bai Reangrok i hani basaya, aini bagoise bok Kaubru aro Tripura kokni gosemwng biywk. Bok Greater Tipraland bimwngno kasogo. Tiprasani thainchano swbaiywk. Ibo simingya, Tripura bai Reangrok bokni hoda-hukumu, mukumu, lukuraida, lukukokrabai, laibumarokno mwthangoi larwknani bagoi khajakmani TRIPURA CHUBALAI BUTHU bai BRU SOCIO CULTURAL ORGANISATIONno jobor hamya hamya salaini chengkha. Tripura kokni hamkraini bagoi songchajakmani TRIPURA WRITERS' FORUMnobo hamya hamya salaini chengkha. Ibo haikai sakni amani kokno hapangni daiyo gosemwng bini thangoi sak bai sak yaisi surlaiywi theranlaimani, koksilchalaimani barikhlai salni slai sal nujagoi tongwk.
Tabok uansokthai aro swngmwng ongkha, Tripura hago tongnai chorok lukurok jani jani amani kok tongoibo braikhlai arokaisa kokno sakni kok hinoi goseni nangsinai?
Sakni amani kokno hapangni daiyo gosemwng bithanigo bokni tma chaiya?
Thainchani bwmwngoi gira gira dopharok sakni kok, hukumu-mukumuno swkmagwi dopha garani kok, hukumu-mukumuno siming gosegwi lanani nangnai ibo bo Constitution daiyo suijak tongkhna?
Assamese, Bangla, Oria kokni solaima nangwk, Bodo, Dimasa, Tiwani bisingono kokthai solaima nangwk mator bok jani jani kokbai suiywi, poregwk, kothe kokni gosemwng tongo hinklai tmwi Kaubru bai Tripura kokni khlai gosemwng maya ongnai?
Aini bagoi chwng uansokthai, jesa dopha, jesa lukubosong sakni amani kok, hukumu-mukumuno hamjaktwi, borom rotwi bwini amani kok, hukumu-mukumunobo hamjakni nangnai, borom roni nangnai. Aiyakhlai khaplab bugwi mwktwi klaiywi jeswkphabo thaincha hinoi chirikdi, ibobai thaincha ongmiya!
Reang bai Tripura dophani lukurok bokni amani kokno hapangni daiyo gosemwng bithanigo bokni mwngsa chaiya krwi aro bok thainchano swbaimanibo klaiya. Ibo bokni rights se.
Sakni gamni bagoi siming uansokai onglak, bwini bagoibo uluk sakangobo uansokni nangnai! Ulugo klaijak dophani kok, hukumu-mukumurokno rwngwi tisanani, mwthangoi larwknani bagoi chwng chorok miliywise samwng makhlainai, naislilaimani kok saklai onglaiglak.
No comments