6 February 2923, Agartala: Tiprasarokni bagoi kha khamjaknai koktma. Tiprasani aro kolsa handogiri Drao Kumar Reang i swngsarno yakarlangkha...
6 February 2923, Agartala: Tiprasarokni bagoi kha khamjaknai koktma. Tiprasani aro kolsa handogiri Drao Kumar Reang i swngsarno yakarlangkha.
Miya 5 February 2023, sareni 6:30 PM jorago basa-bwtwi, suk-thai, kabangma jaiti-masarokno khibiywi i swngcharno yakarlangkha.
Bo 26 December 1937 bisigo omthai thwi klaiywk. Mator bini official record rwgwi achaima sal ongkha 26 December 1940. I sal rwgwi bo langma chophugo bini omor bisi 83.
Shyama Charan Tripura, Nagendra Jamatiani olo TUJSni molni dopha hamkraini lama sainai, TTAADC twbwithanigo choba khlainai Drao Kumar Reang i swngchar yakagwi thangmani bai Tiprasani aro kolsa handogirini porno kmajakkha chung.
Drao Kumar Reang bo Brurokni bisingo poila BA Pass khlainai hinoibo sagwi majakkha.
Drao Kumar Reang 1977 bisigo 37-Shantirbazar Assembly achokthai aro 1988 bisigo 60-Kanchanpur Assembly achokthai daiyo TUJS bodolni ongoi batainai kaplai ongoi MLA onglangkha. Bo TUJS-Congress Tripura hapangni jorago Bolong bedekni montri montribo onglangkha.
Drao Kumar Reang khorokcha dopha hamkraini sengkrak ongoi kabangma jorago TUJS (olo INPT)ni ongoi chongbarigo batailangkha. Paithwk chengthwk mator bo bini je pharichwk dophani bagoi samwng khlaini hinoi lamago akhogwi khorang tisalangkha uatwi-nobarno siyagwi, macha-machagwi, mwktwi kmahwi.
Drao Kumar Reang 1977 bisigo 37-Shantirbazar Assembly chongbari achokthai daiyo TUJS bodolni ongoi bataiywi kaplai ongwk. Aiphu bo 4397 (30.08%) makha. Aiphu o achokthai daiyo Drao Kumar Reang bai batainairok ongkha-- Subodh Chandra Nath (CPM), Pijush Biswas (INC), Lakshmi Nag (Barman), JNP, Sachindra Majumder (Tripura State Congress for Democracy), Sunil Baran Das Gupta (CPI), Anil Chandra Biswas (Indipendent).
1988 bisini Tripura Legislative Assemblyni chongbarigo Drao Kumar Reang 60-Kanchanpur chongbari achokthai daiyo TUJS bodolni ongoi bataiywi CPI(M)ni batainai Len Prasad Malsaino 194 voteni pherbai mechengoi MLA ongkha. Aiphu Drao Kumar Reang vote makha 6457 (39.44%) aro CPI(M)ni batainai Len Prasad Malsai vote makha 6263 (38.25%).
Ibo badebo 1972 bisigo Tripura Legislative Assemblyni chongbarigo Drao Kumar Reang 60-Kanchanpur chongbari achokthai daiyo TUJSni ongoi bataiywk, mator i bataimwng daiyo kechen ongkha. Bo o chongbarigo 856 (12.78%) vote magwi 3rd position tongrwkha. INCni ongoi batainai Raimuni Reang Choudhury 3126 (46.66%) vote manoi kaplai ongkha aro CPI(M)ni ongoi batainai Len Prasad Riang 2138 (31.92%) vote magwi 2nd position daiyo tongrwkha.
1983 bisigo Tripura Legislative Assemblyni chongbarigo Drao Kumar Reang 60-Kanchanpur chongbari achokthai daiyo bataiywi CPI(M)ni batainai Len Prasad Malsaini daiyo 1731 voteni pher bai kecheng ongwk. Aiphu CPI(M)ni batainai Len Prasad Malsai vote makha 6052 (43.21%) aro TUJSni ongoi batainai Drao Kumar Reang vote 4321 (30.85%).
1993 bisigo Tripura Assembly chongbari daiyo Kanchanpur achokthai daiyo Drao Kumar Reang TUJS bodolni ongoi bataiywi CPI(M)ni batainai Len Prasad Malsaini daiyo 3479 voteni pherbai kechen ongwk. Aiphu CPI(M)ni batainai Lenprasad Malsai vote makha 9228 (46.95%) aro TUJSni ongoi batainai Drao Kumar Reang vote makha 5749 (29.25%). Bo o chongbarigo bataiywi kechen ongphabo lukurokni khago hamjakmwng manoi 2nd position daiyo sakni achokthaino larwkmakha.
2013 bisigo Drao Kumar Reang Tripura Legislative Assemblyni chongbarigo bini paithak bataimwng khlaiywk. 60-Kanchanpur chongbari achokthai daiyo Indigenous Nationalist Party of Twipra (INPT) bodolni ongoi bataiywi 1081 voteni pher bai CPI(M) bodolni ongoi batainai Rajendra Reangni daiyo kechen ongwk. Rajendra Reang vote makha 17186 (50.13%) aro Drao Kumar Reang vote makha 16105 (46.98%).
Ibo badebo 1998 bisigo Lok Sabha Salka Tripura achokthaini INC bodolni ongoi Lok Sabhani chongbarigo bataiywi CPI(M)ni batainai Bajuban Reangni daiyo kechen ongwk. Aiphugo Bajuban Reang vote makha 320766 aro Drao Kumar Reang vote makha 248080.
Drao Kumar Reang bana politician simingya, bo kokrabaini hapargobo barikhlai yak kwmwng. Dainik Sambad, Syandan Patrika, Chini Kok koktma blai aro Tripura hani kabangma kokrabai balai daiyo kokkhalrok suitrwngo.
Tiprasano hamjaknai, twidulnai, dophani sikrwng-uansokrwng hinoi sinijaknai Drao Kumar Reang achamitini i swngcharno yakagwi thangmani bai Tripura hani lukurok barikhlai kha khamlaijak.
No comments