Manubazargo Sai-Sai Lukurokni Kuthungmwngo Jitendra Chaudhury bai Pravat Chowdhuryni Auaimwng

10 February 2023, Manubazar: Tripura hago tabokbo yaksi bodolni sakago lukurokni hamjakmwng paiyakho. Hapangni kebengnai bodolgo tongphabo s...

10 February 2023, Manubazar: Tripura hago tabokbo yaksi bodolni sakago lukurokni hamjakmwng paiyakho. Hapangni kebengnai bodolgo tongphabo sakni achokthaino tabokbo krak khlai rwngoi larwgoi tongmakho, ibo tinini luku kuthungmwng daiyono sraicha ongkha.

Tripura Legislative Assemblyni General Election ongnani aro salbase tongsiywk. 16 Februarygo songchajaknai lukuchong raidani ter. Iboni sakango jesa political bodol jani jani bodolni batainairokni ongoi auaimwngo akhojak. Soroni slai soro politicalni phran phununa, soroni slai soro lukurokni daiyo gam koktma kasokroman ibo tabok chorok political bodolni daiyo kaisa challenge ongoi auaijagoi tongwk.

Tini Yaksibodol-Congressni kathalaijak bodolni ongoi 39-Manu chongbari achokthai daiyo batainai Pravat Chowdhury aro 40-Sabroom chongbari achokthai daiyo batainai Jitendra Chaudhuryni ongoi chongbarini auaimwng rwgwi Manubazargo kaisa luku kuthungmwng pana songchajakkha. Tinini i luku kuthungmwng panago phaiywi majakjak lukurokni plikno amjogoi naikhlai nujago tabok yaksibodolno daijo khlai khabai khukbai hamjaknai tongkho. Chakrorokhlai thwngkhola chakya lukurokni kuthungmwng baskangni chongbarigo o kainoi achokthai daiyo yaksibodolno mechennani bari kuthuk. Tomwng vote tanjakya hinklai yaksibodolni batainairok kaplaiphabo ongoi mano! 

Jitendra Chaudhury bai Pravat Chowdhuryno chongbarigo kaplai khlaini bagoi tinini auaimwng rwgwi songchajak luku kuthungmwng panago CPI(M) Politburoni adong Brinda Karat, Congress bodolni ojama Sudip Roy Barman phaiywi majagoi CPI(M) bodolno vote rogoi kaplai khlaidi hinoi lukurokni daiyo kok kwcharkha.