20 January 2023, Agartala: 'Ani Vote Ani Manthai' panabatangno bwskango larwgwi phainai 21 January 2023 salmarigo yaksibodol bai Con...
20 January 2023, Agartala: 'Ani Vote Ani Manthai' panabatangno bwskango larwgwi phainai 21 January 2023 salmarigo yaksibodol bai Congressni kwthalaijak bodol 'Secular Democratic Force' chongmari commissionni daiyo kaisa deputation rojaknai.
Miya Agartala Press Clubgo songchajak koktmathungnai panani bisingtwi saklaikha yaksibodol ebakhlai left-front-congress kwthalaijak bodolni ojamarok.
Iboni sakango MLA Hostel daiyo left-front bai Congressni bisingo Assembly achokthai baklaimano lagwi kaisa kokchaplaima pana songchajakkha. Aro salkisa olo left frontrok batainairokni bwmwng saklainwk. Iboni olo Congress bodolbo batainairokni bwmwng saklainwk. Mator iboni sakango kwthalaijak bodol 'Ani Vote Ani Manthai' no lagwi Rabindra Bhavan baskango kuthunglaiywi chongbari commissionni daiyo kaisa gara khlai himbotoni bisingtwi deputation rojaknai.
Left-frontni jorago Congressni adongrok butharjakkha aro Congressni joragobo left-frontni adongrok butharjakkha. Jabwini ualai-bulai ongmano poloklaiywi BJP-IPFTni bisiba jorago Tripura hago lukuraida, kerongraida krwi, kebengnai bodolni sakago chopromani, buthar-toktharjakmano kasonani bagoi chwng thaincha ongni nangkha hinoi koktmathungnairok bai swngjagoi saka CPI(M) Tripura hani tangphang Jitendra Chaudhury bai Congressni MLA Sudip Roy Barman.
Iro CPI(M) Tripura hani tangphang Jitendra Chaudhury, CPIni Narayan Kar, TPCC-ni twiphang Birajit Sinha, MLA Sudip Roy Barman, kacham MLA Ashis Saha song tongbaiywk.
No comments