25 January 2023, Agartala: 2023 Tripura Legislative Assembly chongbarini nomination yapharnani paithak sal ongkha 30 January 2023. I chongb...
25 January 2023, Agartala: 2023 Tripura Legislative Assembly chongbarini nomination yapharnani paithak sal ongkha 30 January 2023. I chongbarino lagwi salba jora ongkha tabokbo independent ongoi bachanai Purushottam Roy Barmanni bade aro krwngsa political bodolbo candidate ebakhlai batainaini bwmwng saklailaiyakho.
Iboni bisingo Tipra Motha soro bai aphak ongno ongya, saichongde bataino ibono lagwibo thwngkrwngni hapargo naisinglaijak. Baksa baksa lukurok, koktma auainairok sagwi tongkha Tipra Motha CPI(M) bai aphak ongnai, BJP bai aphak ongnai ibotwikhlai.
Mator kwbwi kok ongkha Greater Tipraland bimwngno lagwi je bodol Tipra Mothano Constitutional Solutionni written rogwi manai o bodol bai aphak ongnani uansok nainai. Written suiywi royasak jora kaisa bodolbai aphak ongnani kok salaiya hinoi bobagra ebakhlai Tipra Mothani kasku uaire uai sagwi tongwk.
Iboni bisingo tabok bari nangsokmani kaisa kok ongkha, 'Ministry of Home Affairsni siming kokthum sagwi makha je bok chwngbai Greater Tipraland bimwngni Constitution solutionno lagwi chwngbai kokmalama salainani naiywk' hinoi bobagra social mediani bisingtwi saklaimani.
Bobagrani i saklaimani tomwng kwbwi ongoi tongkhlai Tipra Motha baskangni Assembly chongbarigo BJP bodol bai aphak ongya i kokno kebo samaya. Tmwi hinba sakni bimwngni Constitution solutionni written mankha hinklaiba Tipra Motha BJP bodol bai aphak ongwi mano!
Aini bagoi bobagra saklaikha, jesa bodolbaibo achokthai baklaimano lagwi mwngsabo kokmalaima salaimani hinoi kok lwgwi tongkha hinoi sagwi makha. Chwng Ministry of Home Affairsni siming kokthum sagwi makha je bok chwngbai Greater Tipraland bimwngni Constitution solutionno lagwi chwngbai kokmalama salainani naiywk. Chwng uaire-uai sagwi tongwk jeswk jora chini bimwngni Constitution solutionno lagwi GoIni siming written suimwng manya hinklai chwng kaisabaibo aphak ongya ebakhlai achokthai baklaiya.
"Contrary to rumours there has been NO talks of seat sharing as reported with any party ! We have received intimation from ministry of home affairs that they would like to talk to us on our demand for a constitutional solution to our demand of Greater Tipraland . We have repeatedly said UNTIL we don't get a written assurances from GOI on the constitutional solution of our demand we will not go in for any alliance leave alone seat sharing . Please don't jump the gun and relax - we know how to negotiate for our people to the maximum"
Tini kacham montri Mevar Kumar Jamatia, TTAADC-ni EM Chitta Ranjan Debbarma, TTAADC-ni achokphang Jagadish Debbarma, Dy.CEM Animesh Debbarma, Tipra Mothani twiphang Bijoy Kumar Hrangkhawlno lagwi TIPRA Mothani bodolsa ojamarok Delhigo thanglaijak.
Iro kacham montri Mevar Kumar Jamatia koktmathungnairok bai swngjagoi sraicha khlai saka Delhigo Union Home Minister bai malaini bagoi thangwk hinoi.
TTAADCni achokphang Jagadish Debbarma koktma thungnairokno saka, Barot hagara haphang chwngbai malainani ringkhlai chwng malaimano. Chini bimwngno gosegwi lago hinklai chini mwngsa kebengmwng krwi. Naigranopha Barot haphang chwngno ringkhaba kokmalama salaiywi.
Greater Tipraland bimwngni knogwide phaika hinoi koktma thungnairok bai swngjakkhlai bo saka, chini bimwngni chwng knogwi phaiya, chwng Greater Tipraland bimwng daiyono tongnai. Situationno naikhogwi tma khlaiman Ibo Barot haphang nainai.
No comments