CPI(M) MLA Moboshar Ali bai Subhal Bhowmik BJPni Bana Rwngkha

28 January 2023, Agartala: phainai 16 February, Tripura Legislative Assemblyni chongbari. Chongbarini sakango CPI(M) bodolni uanajaknai kok...

28 January 2023, Agartala: phainai 16 February, Tripura Legislative Assemblyni chongbari. Chongbarini sakango CPI(M) bodolni uanajaknai koktma. Kailashahar achokthaini CPI(M) bodolni MLA Moboshar Ali bai Trinamool Congress Tripura hani twiphang Subhal Bhowmik jani jani bodol yakagwi miya New Delhigo BJP Central Committeeni habanogo BJP bodolni bana rwngkha. Bokno BJP bodolni bana rwngrogoi bodolgo lamjokha Tripurani montriokra Dr. Manik Saha, BJP Tripura Pradeshni twiphang Rajib Bhattacharjee song. Ibo simingya BJP National President J.P Naddabo tongwk.

I chongbarigo CPI(M)-Congress kwthalaijak bodol Kailashahar achokthaino Congressni daiyo yakagwi maromani bagoi o achokthaini CPI(M) bodolni MLA Moboshar Ali baskangni chongbarigo batainani ticket maliya. Paithago CPI(M) bodol yakagwi BJP bodolgo yapri rokha.

Oijang BJP bodoltwi kacham twiphang yakchu 2018 bisini Assembly chongbarigo achokthai rojakgoibo kaplai ongmaliya, Iboni olo Lok Sabhani chongbarigo achokthai rojakliya ongoi BJP bodol yakagwi Congress bodolgo yapri rokha. Iboni olo Congress bodol yakagwi Trinamool Congressgo yapri rokha. Ibotwikhlai kaisa bodol paikhlai aro kaisa bodolgo yapri ronaisa Subhal Bhowmikbo aro uaisa BJP bodolgo yapri rokha. 

Assembly chongbarini nomination yapharjaknaj paithak sal 30 January. Mator hapang BJP bodol tabokbo batainairokni bwmwng saklaijakyakho. Iboni sakango CPI(M) MLA Moboshar Ali bai Trinamool Congress Tripura hani twiphang Subhal Bhowmik sakni bodol yakagwi BJP bodolgo yapri romanibai bokno bode BJP bodolgo batainani sep rono? Ibo tabok swngmwng gara ongoi kasajak.

CPI(M) bodolni MLA Moboshar Ali CPI(M)no bodolgo lamjokha BJP Tripura Pradesh President Rajib Bhattacharjee bai montriokra Dr. Manik Saha

Trinamool Congress Tripurani twiphang Subhal Bhowmikno bodolgo lamjokha BJP Tripura Pradesh President Rajib Bhattacharjee bai montriokra Dr. Manik Saha