Khumulwngo Shyama Charan Tripura, Nagendra Jamatia, Bir Bikram Jamatiani Mangthong Achokrojakkha

Khumulwng, 14 October 2022: tini TTAADC haphangni chaitokmani bai Khumulwngni Main Administrative Building baskango kaisa pana songchajakman...

Khumulwng, 14 October 2022: tini TTAADC haphangni chaitokmani bai Khumulwngni Main Administrative Building baskango kaisa pana songchajakmani bisingtwi dopha hamkraini samwng tanglangnai Shyama Charan Tripura, Nagendra Jamatia, Bir Bikram Jamatiani Kokchap Nokni haplam baskango mangthong achokrojakkha.

Pana chengmani olo Shyama Charan Tripura, Nagendra Jamatia, Bir Bikram Jamatiani nukhungni borokrok bokno rwgwi bokni langmani kokno sagwi khnarokha.

Iboni olo phaiywi majakjak naruairok khorokcha khorokcha khlai kok saka. EM Kamal Kalai, EM Chitta Ranjan Debbarma, CEM Purna Chandra Jamatia, achokphang Jagadish Debbarma song koklarwkha.

Panani paithago hani bobagra Pradyot Kishore Manikya hano hamjaknai dophano hamjaknai, TTAADC twbwi rophainai oijang masingo matai chajak chlaknoi Shyama Charan Tripura bai Nagendra Jamatia, aro hani bagoi langma rolangnai Bir Bikram Jamatiani mangthong achokrojakno phiyogoi rokha. Iboni olo bobagra kok larwkha ha dophano rwgwi.

Bokni badebo panago phaiywi majakkha EM Bhaba Ranjan Reang, EM Dolly Reang, EM Rajesh Tripura, MDC Hongsha Kumar Tripura, MDC Uma Shankar Debbarma, MDC Ganesh Debbarma, West Zoneni achokphang Ranjit Debbarma song.

Shyama Charan Tripura, Nagendra Jamatia, Bir Bikram Jamatiani nukhungni borokrokbo panago phaiywi majakkha.

I panago lamjogwi kok larwkha TTAADC-ni CEO C.K Jamatia, IAS aro panano kok larwgwi mwthakkha Addl. CEO Dhan Babu Reang.