Agartala, 5 October 2022: sirisitini raida rwgwi Bijaya Dashamini salo Tripura hani bobagra 'Hosom Bojan' panani bisingtwi kothe kot...
Agartala, 5 October 2022: sirisitini raida rwgwi Bijaya Dashamini salo Tripura hani bobagra 'Hosom Bojan' panani bisingtwi kothe kothe hodani okra chakrarok bai Noyongmago malaiywi Kokmalama salaiywk, kokbiti rolaiywi lalaiywk, borom rolaiywk lalaiywk aro painchodarini kurung kuthung khlaiywk kuthunglaiywi maikhopcha chalaiywk.
Tabok Tripura hastego lukuraida cholegwi tongphabo sirisitini bobagrani manigwi phaijak raidarokbo tal sal handogirino kosol khlai manejagoi palaijagoi tongwk. Bijaya Dashamini salo hani bobagra kothe kothe hodani okra chakrarok bai malailaimani ibo kaisa kacham raida.
Sirisitini raida rwgwi tini Agartalani Manikya Court daiyo bobagra Pradyot Kishore Manikyani ringkhomwng aro jugalmwng bai sirisitini 'Hosom Bojan' pana songchajago. I panago Tripura dophani Naran, Pomang, Roaja, Jamatia hodani Hodaokra, Bru dophani Rai, Kaskau, Koloi Samajni Rai, Debbarma samajni Kami Chokdri, Noatia hodani hodaokra, Molsom hodani Kamchikau, Uchoi hodani Sarpa, Rupini hodani Rai, Murasing hodani twiphangno lagwi Garo, Karbong, Kaipeng aro kabangma hodani hodaokrarok phaiywi majakkha. Kothe kothe hodani okra chakrarok bobagra bai malaiywi ha, dopha, bobagrani hamkraini bagoi, thainchani bagoi nangmani kokbiti rolaikha aro bobagrani daiyobo kokbiti khnaka.
Tinini i 'Hosom Bojan'ni salgo jotoni slai khatongjaknai aro uanajaknai kok ongkha kothe kothe hodani hodaokrarokni badebo kothe kothe bodolni ojama ebakhlai lukuadongrokbo Noyongmago phaiywi bobagra bai malaikha.
Iboni bisingo tongo CPI(M) Tripura haste tangphang ebakhlai kacham MP machang Jitendra Chaudhury, hasteni kacham montriokra machang Biplab Kumar deb aro bini logesong Niti Deb, Congress bodolni MLA machang Sudip Roy Barman, aro kabangma lukuojama aro lumuadongsong. I malaimwng daiyo chorok lukuadongrok bobagrano Bijaya Dashamini khagam aro hamjakma yapharka.
No comments