Tapas Tripura Chongjakkha ‘The Buddhist Society of India’ni Central Executive Committeeni Adong Agartala: ‘The Buddhist Society of India’ni...

Tapas Tripura Chongjakkha ‘The Buddhist Society of India’ni Central Executive Committeeni Adong

Agartala: ‘The Buddhist Society of India’ni Central Executive Committeeni khorokcha adong chongjakkha Tripura hasteni machang Tapas Tripura. I koktma Tripura hastego kasokphaimani olo barikhlai khatonglaimani nujakkha lukurokni daiyo. Bono khagam ephalaikha hasteni lukurok.

Koktmago sagwi majakkha, thangnai 31 May 2022 salmarigo Telangana hasteni Hyderabadni Cent Hotel daiyo songchajago The Buddhist Society of Indiani kaisa kuthuunglaimwng kokmalama pana. I kokmalama pana daiyo Central Executive Committeeni adong, haste beremni twiphang aro tangphang song phaiywi majakkha. I kokmalama panago achokphang ongoi achokha Trusteeni Chairman ebakhlai achokphang Dr. Harish Rawalia. Kokmalama panago phaiywi majakjak chorokni gosemwng bai mothano arobo gamkhlai chalogwi tlangni bagoi National Vice-President, National Secretaries aro Central Executive Committeeni adong sitongnani kok chapjakkha.

Kokmalama panago kok chapjakmanitwi thangnai 8 September 2022 salmarigo The Buddhist Society of Indiani No.BSI/CC/108/22 kokton blaini bisingtwi The Buddhist Society of Indiani National President Chandrabodhi Patil machang Tapas Tripurano The Buddhist Society of India, Central Executive Committeeni adong chongoi rokha. Ibo simingya, machang Tapas Tripurano The Buddhist Society of India haste beremni committee daiyobo State In-chargeni achokthaiyo chongoi rojakkha. 

Advertisement 

Tapas Tripurani nok Dolai hangkorni Longtrai Valley bwkhakste daiyo. Bo jora kalokma rwngwi Tripura hasteni kabangma hoda-hukumu motha bai krwngoi ha-dopha hamkraini bagoi samwng tangoi tongo. Bo The Buddhist Society of India, Central Executive Committeeni adong chongjakmani ibo hasteni lukurokni bagoi koktma gam. Twmwi hinba, bini samwng gamni bagoino bo The Buddhist Society of Indiano kosol hagara beremni mothago samwng khlaini bagoi sep mago aro barja ephajago.