MP Rebati Tripurani Chaitokmwng bai CBSE Daiyo Kokborok Subject

Kokborok Tripura hastego tongnai kabangkuk Tiprasani amani kok. I kokbai Class I -ni siming Universitygo PG Course jora porenani sep tongo. Kokborok bai Ph.D khlainanibo sep tongo.

Kokborokno Tripura hasteni kaisa haphangni kok hinoi goseroni thangoi amani kokni bagoi sakni langmano rolangkha Dhananjoy Tripura. Alindralal Tripura bini langma tongsak saktharlangkha Kokborokni hamkraini bagoi. I laibumano chwng chorok sagwi mano, polokjaknai kokya. Dhananjoy Tripurani khakchapni thwi kochokmani bai 19 January 1979 bisiyo Kokborokno Tripura haste haphang haphangni kok hinoi gosegwi lakha "The Tripura Official Language (Amendment) Bill 1979 (The Tripura Bill No. 1 of 1979" ni bisingtwi.

Kokborokno Tripura hasteni TRIPURA BOARD OF SECONDARY EDUCATION bai naikoljak chorok rwngnok daiyo porenani sep tongphabo CENTRAL BOARD OF SECONDARY EDUCATION bai gosejak rwngnok daiyo Kokborok porenani sep krwi. Ibono lagwi laithangjak Tripura haste haphangni joragobo khorang tisajakkha kisamisa mothani phaichingtwi. Mator gosegwi rojakliya.

2018 bisiyo Tripura hastego BJP-IPFT kathalaijak haphang phaimani olo Tiprasani hamkraini bagoi kabangma samwngbatang yago lajakkha aro samwngno jai-jaikhlai charogwi tisajakkha. Ibono chwng konorogwi tongnani, huiywi tongnani kokya. Iboni bisingyo kaisa ongkha CBSE-ni syllabus daiyo Kokborok subjectno include khlaijakmani.

CBSE daiyo Kokborok subject include ongmani ulogo jeni bwmwmgno chwng poila khurchani nango bo ongkha Lok Sabha Salka Tripura achokthaini boromgnang MP machang Rebati Tripura. Bo MP ongmani olo Tripura hasteni hamkrai aro Tiprasani hamkraini bagoi yakchoyagwi twlwk-twlwk samwng tangwi tongo. CBSE daiyo Kokborok subjectno dakha, parliament daiyo Tripura hasteni Scheduled Tribes listno amendment khlaiywi Darlong Tribeno dakha, Tripura hasteni ulogo klaijak hangkor Dolai Hangkor daiyo Medical College khulaknani gosemwng toboi rophaika, katal-katal lahar snamni bagoi gosemwng toboi rophaika ibohai kabangma samwng batangno charogoi tisathaniyo MP machang Rebati Tripurani samwng-homwng barikhlai khaphurjaknai. 

CBSE daiyo Kokborok subjectno danani bagoi machang Rebati Tripura MP ongmani olo thangnai 3rd March 2021 salo Parliamentni 377 raida rwgwi Parliamentni Session daiyo bachagwi swngmwng tisagwi khorang tisaka. Bini swngmwngni Ballot Position Number ongkha 30. CBSE daiyo Kokborok subjectno danani lagwi boromgnang MP-ni i khorang kwkwbwino emangni mwkthang ongkha. Barot hagarani boromgnang rwngmontri machang #Dharmendra_Pradhan Tripura hasteni Kokborok sanai lukurokno boom rogoi MP-ni khorangno yachagwi CBSE daiyo Kokborok subjectno dagwi rokha.

Boromgnang MP-ni i khorang bai tabok Tripura hasteni Kokborok sanai sai-sai cherai-khnairok CBSE bai naikoljak rwngnogo Kokborok subject lagwi porenani sep mansinai. Machang MP-ni ibotwijati seler-ari krwi, nini ani hinyagwi ha-dophani hankraini bagoi kathar-kwbwi bai samwng tangmani ibono chwng hambai rosini rogwi paisokya. 

CBSE daiyo Kokborok subjectno danani bagoi machang MP-ni badebo MLA Dr. Atul Debbarma aro MFK, KOHM, TSF, ATISA, TSB-no kosol Tripura hasteni kisamisa motha hagara haphangni daiyo kokton suiywi khorang tisaka.

Iro i kokbo khurchathai klaiywk, jorago MP machang Rebati Tripurani bwmwngwi kabangma lukurok kok aida sa-sagwi WhatsApp, Facebook group snamgwi bono therankha, hinka, sikri-sokro khlaika, bini bwmwngwi kok hamya pirkha hodani khagira aro khabara lukurok. Mator MP Rebatini ibotwi gam samwngno numani olo bokni daiyo kisalai khabachanai aro khasichanai je Rebati Tripura bo Tiprasani hamya naiya, hamkraise naiywk.

Boromgnang MP machang Rebati Tripura aro Barot hagarani boromgnang rwngmontri Dharmendra Pradhan no barikhlai khagam aro hambai yapharo, nohkni i kathar-kwbwi samwngni bagoi.