28 January 2023, Agartala: IPFT bodol soro bai thangnai tongnai Ibono lagwi thangnai salkisa jorani siming Tripura hago barikhlai kok kasaj...
Bobagra Pradyot Kishore Manikya naiywk Tiprasani thaincha aro Tiprasani vote bakjakyatwi IPFT bodolno Tipra Mothago klwngwi thaincha khlai Assembly chongbarigo batailainwk. Ibono lagwi Tipra Motha bai IPFT kainoi bodolni bisingo kokton suilaikha. Kainoi bodolni ojamarok Guwahatigo malaiywi kokmalamabo salaika.
Kokmalama salaimani olo Tipra Motha bai IPFT bodolni ojamarok Guwahatigo tongoi social mediani bisingtwi saklaikha kainoi bodolni bisingo thaincha ongoi chongbarigo batainai hinoi.
I koktma gam lukurokni daiyo kasokmani olo barikhlai khatongjaklaikha salcha salnoi jora rwngwi. Mator i khatongmani koktma iswk aiyok klau ongliya.
Iboni olo IPFT bodolni Aghore Debbarmano bodolni chaiya samwng khlaijakpho hinoi bodolni karegoi rokha.
Bobagra tini phurungni damchisa jora naisingoi naikha IPFT bodolno, mator mwngsa koktma sopaiyani bagoi Tipra Motha saichung batainai hinoi bobagra saklaikha arouaisa.
Tini sare atlogo BJP Tripura Pradeshni habanogo songchajak koktma thungnai panani bisingtwi IPFT bodolno khoroknoi tangkrano korego achokrogoi Tripurani montriokra Dr. Manik Saha saklaikha, BJP bodol IPFTno aphak lagwi thangnai 2018 Assembly chongbarigo bataiywi poila hapang phaiywk. I aphakni halok 2023 Assembly chongbarigobo tongnai. IPFT bai BJP thainchakhlai 2023ni chongbarigo batainai. IPFT bodolni haido khlaimwng bai kaiba achokthai rokha hinoi saka.
Iboni olo IPFT BJP bodol bai aphak ongmanino lagwi kok sagwi khnarokha Sukla Charan Noatia.
I kaiba Assembly achokthaini bisingo soro bo achokthai batainai ibo ongkha--
12-Takarjala (ST)- Bidhan Debbarma
24-Ramchandraghat (ST)- Prashanta Debbarma
26-Asharambari (ST)- Jayanti Debbarma (thwijanai N.C Debbarmani basajwk)
38-Jolaibari (ST)- Sukla Charan Noatia
60-Kanchanpur (ST)- Prem Kumar Reang.
No comments