Kokmalama, 1 October 2022, Agartala: Tripura hasteni chorok Tiprasarokni thinangni kokno uansogoi jora kalokma rwngwi IPFT, Tipra Motha b...
Kokmalama, 1 October 2022, Agartala: Tripura hasteni chorok Tiprasarokni thinangni kokno uansogoi jora kalokma rwngwi IPFT, Tipra Motha bodol 'Tipraland', 'Greater Tipraland' bimani chwng nukha. Ibo simingya, TTAADC amchaiyo Inner Line Permit ronani, hastego NRC ronani, hastego CAA taphnangdi, ibobadebo hasteni Tiprasarokni kabangma jwngjalrokno lagwi Barot hagara haphangni daiyo khorang tisagoi phaika kabangma political bodol aro hoda-hukumu motha, ibobo chwng nukha aro khnaka.
Mator hasteni bana kaisa dophani bagoi siming ha kothe biywi khorang tisamanilai taboksak jora nuyakho aro khnayakho. I khnaya koknono tabok khnaka aro nukha.
Thangnai 28 Sept. salo Sagar Chakma aro Jyotish Chakma bwmwngoi khoroknoi Chakma basa social mediani bisingtwi Pecharthal, Chawmanu, Gondatwisa, Karbook amchaino lagwi 'Chakmaland' snamni bagoi khorang tisamani nujakkha. Chakmarokni ibotwi bimwngni uansokmwng bari krimasangcha. I bimwng katal kokya. Jora kalokma rwngwi Chakma dophani sikrwng-uansokrwngrok Tripura hastego 'Chakmaland' ebakhlai 'Chakma District Council' binani bagoi bising-basargo kokchaplai tonglaiywk hinoi kisamisa khnai phaimani ebakhlai koksilchajagoi phaimani ibo tabok dadak-sidak khlaiywi baskango nujakni chengkha Sagar Chakma bai Jyotish Chakmani social mediago post khlaimani bisingtwi.
Je jegago hasteni Regional Party, hoda-hukumu motharok chorok Tiprasani hamkrai aro thinangni kokno uansogoi kotha ha bilaikha, I jegago hasteni Chakmarok bana Chakmarokno lagwi siming 'Chakmaland' biywi khorang tisani chengmani ibo hasteni chorok Tiprasarokni bagoi baswk joratwi gam ongno, baswk joratwi thinango jwngjal achairono ibono lagwi sijak-nujak okra-chakrarok jora tongsani uansokthai!
Tabok i hani bobagra boromgnang Pradyot Kishore Manikya hasteni chorok Tiprasarokno thainchani lamago twbwini chaitogoi tongmanigo Chakmarok 'Chakmaland' biywi khorang tisamani ibo thinangni bagoi thainchani busu de ongoi bachama klai ibonobo cheroi sukrugwi naithai klaiywk!
Naiywi naidi Sagar Chakmani 'Chakmaland' biywi khorang tisamani- https://m.facebook.com/story.php?story_fbid=pfbid0281Pnzo2QNpWse4sgsgwxzdtR5irm8rNzUhWk5GNJqjMSeKfzQYBTnKg9S6mww9xMl&id=100003250478724
Naiywi naidi Jyotish Chakmani 'Chakmaland' biywi khorang tisamani- https://m.facebook.com/story.php?story_fbid=pfbid0BWJmiaDpifk4fm6gZcVxGBCfuF5d3P2SciSYgTvr9XBHX8NAVL438tSvg2WUKRdXl&id=100023920882989
No comments